Pizza leh Burger-te ina kan sem theih chuan Ration pawh in tinah kan sem thei ang : Arvind Kejriwal

Delhi sorkarin khawpui chhunga ration la te, an ina an kawtkaiah ṭheuh ration pekchhuah a tumna sorkar laipuiin a dodal hnuin, Delhi chief minister Arvind Kejriwal chuan mi retheite chanvo leh hmasawn tuma ruahmanna an siam laiin, ration mafia-te duhdan angin sorkar laipui chu a awm a ni, a ti.

"'Doorstep delivery of ration' scheme Delhi-a kalpui kan tum hma ni hnihah, sorkar laipui chuan a dang bet a ni. Pizza, burger, smartphone leh thawmhnawte inah kan pek theih chuan engah nge ration pawh kan pek theih loh bik ang" tiin Kejriwal chuan a zawt.

"A vawikhatnan sorkar chuan ration mafia-te dang turin hma a la a, mahse heng Ration mafia te thiltihtheihzia hi in hmu ta a ni. Scheme kalpui a nih hma karah an tihtawp tir nghal mai hi," tiin a sawi.

Sorkar laipuiin he scheme atan phalna a dil lo nia Delhi sorkar a puhna chu chhangin, Kejriwal chuan, "Scheme kalpui tur hian sorkar laipui pawmpuina a neih a ngai kher lo. Mahse buaina a thlen thulh hlauh vangin phalna hi ṭum nga lai chu kan dil a ni," a ti. Sorkar laipuiin a dan sak tak, doorstep ration delivery scheme hi Delhi khawpuia ration dawng thei chin, mi nuai 72 velin an chhawr theih tur thu a sawi bawk.

"Sorkar laipuiin tupawh mai a do let zel avangin mipui an mangang tawh a ni. Hetia kan in ep reng chuan engtin nge Covid-19 kan do hneh ang. He scheme hi min hmantir ula, hmingṭhatna chu PM Modi kan khumtir vek ang. Ration hi AAP emaw BJP kuta awm a nilo. Mipuite hian Modiji leh Kejriwal-ten khawsak harsate tan ration an sem tih an chhiar duh a ni. Kut suih chungin kei leh Delhi khawpuia cheng mirethei nuai 70 aiawhin, he scheme hi min kalpui tir turin ka ngen che u a ni" tiin Kejriwal chuan sorkar laipui a ngen.