Thla 2 hnua hri kai tlakhniam ber ṭum thleng leh

India ramah Pathianni khan hri kai thar 1,00,636 awmin, thla hnih hnua hri kai hmuhchhuah tlember ṭum a thleng leh. Hemi ni vek hian hri vangin mi 2,427 an thi a, hri vang hian mi 3,49,186 an thi tawh a ni.

Ni 25 chhung chu hri kai thar aiin dama chhuahtir an tam zawk a, Pathianni khan hri kai enkawl dam 1,74,399 an awm tih Health Ministry chuan a sawi.

Hri kai mek pawh 14,01,609 ah tla thlain, ramchhungah ni 11 chhung chu hri kai mek nuai hnih hnuai lamah a tla thla tawh a ni.

Indian Council of Medical Research chuan June 6 thlenga sample test tawh 36,63,34,111 niin, Pathianni khan sample 15,87,589 endik leh a ni tih a sawi. Ramchhunga vaccine semchhuah kal pui anih aṭangin dose 23,27,86,482 semchhuah a ni tawh bawk.

Maharashtra-ah chuan Pathianni khan Covid kai 12,557 awm belh lehin, mi 233 in an thihpui. Hri vangin 1,00,130 an thi tawh. Hri leng tla hniam zel karah hian Maharashtra chuan inthlahdul dan tur chhawng ngana a tichhuak dawn tih a puang.

Delhi-ah chuan Pathianni khan hri kai 381 neih belh in, thihpui 34 an awm. Positivity rate chu 0.5% a ni.

State leh Union Territory-te chuan April thla laihawl aṭanga Covid-19 leng thawh hnihna zulzuia inkaihhruaina an lo siam tawh pawh zawi zawi in a thlahdul ṭan. Haryana-ah chuan June 14 thleng lockdown pawh sei nimahse inthlah dulna tam tak siam tel a ni.