Delhi sorkarin 'Jahan Vote, Wahan Vaccination' campaign ṭan

Delhi sorkar chuan nimin aṭang khan vaccine pek chhuah runpui kalpui dan thar, polling station tina vaccine lak theihna tur, Jahan Vote, Wahan Vaccination' campaign chu a kalpui ṭan.

Chief minister Arvind Kejriwal chuan he ruahmanna thar hmang hian kar 4 chungin khawpui chhunga kum 45 chunglamte chu vaccine pek vek hman an tum tih a sawi. An polling booth ṭheuhah vaccine hi an la thei dawn a ni. Booth-level officer-te chuan inah tlawh kualin, kum 45 chin vaccine la lote chu polling booth-ah hian vaccine la turin an tir zel dawn a ni, a ti.

Kejriwal chuan sor­karin vaccination centre a siamah kum 45 chunglamte hi vaccine la turin an kal ṭha lo hle tih a sawi. Hei vang hian an in aṭanga hnaivai taka an lak ṭheuh theihna turin ruahmanna hi siam a ni a, vaccination centre-a hruaitu tur e-rickshaw-te pawh sorkar chuan a ruahman vek tih a sawi.