Twitter aiin vaccine chungchang buaipui zawk rawh u : NCP

National Congress Party (NCP) chuan nimin khan centre-a rorellai, BJP chu micro-blogging site Twitter-a 'blue tick' verification badge a buaipui chungchangah bei letin, Twitter tih vel aiin ram chhunga vaccine tam zawk pek chhuah dan buaipui zawk turin a ti.

Tun hnaiah Twitter hian vice president M Venkaiah Naidu leh RSS hotu Mohan Bhagwat-e personal account-a 'blue tick' badge a pek chu a titawp sak a, mahse a hnuah a pe ṭha leh ta tho a ni.

NCP thupuangtu, Nawab Malik chuan blue tick tih vel chungchang BJP leh sorkar laipuiin an buaipui laiin, ram mipuite erawh chu Covid-19 vaccine an lak theih dan tur buaipuiin an buai thung a ni, a ti. "Blue tick leh vaccination chungchang pawh ni se, sorkar laipui chuan sawisel a tawhna chu a ngaihven duh lo a, midangte ngaihtuah loin chapo takin a khawsa zui zel tho a ni," tiin a sawi.