PM Modi-a'n thuchah sawi

Prime minister Narendra Modi chuan nimin tlai dar 5 khan TV kaltlangin ram mipuite hnena thuchah a sawi. Hei hi kum 2020, March thla hnuah TV kaltlanga thuchah a sawi ṭum 10-na a ni.

PM hian hripui leng mek do hna chu ngawrh taka kalpui chhunzawm zel a ni tih sawiin, ram chhunga siam ngei, vaccine tam zawk neih a nih tur thu leh, rei loteah supply pawh tihpun theih a nih tur thu a sawi. Hri vanga thi chhungte a tawrhpui thute a sawi bawk. Modi-a thusawi ṭhenkhatte-

• Hri leng mek hi kum 100 chhunga hri leng hlauhawm ber a ni a, hri leng thawh hnihna kan hmachhawn mek. Ram dang ang bawkin India pawhin hun harsa tak a hmachhawn a ni.

• Kum khat chhung lekin India rama vaccine siam ngei pahnih kan tlangzarh hman a, mi vaibelchhe 23 chuang hnenah vaccine pek a ni tawh bawk.

• Company pasarihin vaccine hrang hrang an siam mek a, heng zinga pathum chu trial neih mek a ni.

• Vaccine supply pawh rei loteh tihpun a ni ang. Vaccine tam zawk a awm theihna turin ram pawn lam aṭanga lakluh dan tur pawh ngaihtuah a ni

• Expert-ten naupang dinhmun an ngai pawimawh hle a, vaccine pahnih chu naupang tana hman theih turin trial neih mek a ni.

• Kum 1.5 chhungin health infrastructure thar tam tak siam thar a ni, Covid hospital, ventilator bed, testing lab eng emaw zat siam thar a ni.

• Hri leng thawh hnihnaah oxygen mamawh nasa takin a zual a, oxygen siamchhuah nasa taka tihpun niin, a thawndarhna atan Oxygen Express tlan tir an ni a, IAF leh Navy lam pawhin theihtawp an chhuah bawk.

• June ni 21 aṭangin State-te hnenah a thlawnin vaccine pek a ni dawn a, sorkar laipuiin company aṭangin 75% leiin a bak 25% chu state ten an lei thei ang.