Covid damdawi atan Ivermectin leh Doxycycline hmang tawh dawn lo

Union health ministry hnuaia directorate general of health services (DGHS)-in Covid hri kai enkawlna dan a tihchhuah tharah, symptom nei lo leh mild case tan antipyretic leh antitussive tih loh damdawi dangte hmang tawh lo turin a ti.

Guideline thar tihchhuahah hian hydroxychloroquine, ivermectin, doxycycline, zinc, multivitamins leh a dangte, Covid-19 kai symptom nei lo leh la na vak lote tana doctor-ten an chawh ṭhin chu tihtawp vek a ni a, mahse khawsik tan antipyretic leh hritlang tan antitussive an chawh ṭhin erawh paih tel an ni lo thung. Covid-19 laka inkaihhruain dan siamte ngai pawimawh chungin, mask vuah, kut fai taka sil, taksa inhlata awm, Covid symptoms neite a rang thei ang bera mithiam rawn ṭhin tur leh taksa tana ṭha tur ei tam leh tui in hnem turtein DGHS chuan mipuite a chah nghal bawk.

Covid hri kai, enkawl mekte chu an chhungte nen phone,video-call leh kawng dang hmanga inbe pawp fo a, a eng zawnga thlira infuih ṭhin turin an ngen bawk a ni.

Hri kai natna langchhuak lo tan, damdawi hmanga inenkawl a ngai kher lo a, chutihrualin natna benvawn nei sa an nih chuan an damdawite an ei chhunzawm tur a ni.

Natna langchhuak tan mahni dinhmun uluk taka enthla a, khawsik, thawk lama harsatna, oxygen level dinhmunte mahnia in enfiah fo turin a ti.

Hri kai natna langchhuak tan Antipyretic leh Antitussive hmanga enkawl, awmna nei tan ni nga chhung budesonide inhalation, ni khatah dose 800 mcg vawi hnih zela ti ṭhin turin a ti bawk a ni.

'Enkawlna dang hranpa a ngai tawh lo.Mahse an dinhmunin zual lam a pan zel erawh chuan enfiah zui vat erawh a ṭul a ni,' tiin guidelines tharah hian an tarlang.

Hri kai enkawlna atan Ivermectihn damdawi hman hian a hma pawhin sawi a lo hlawh tawh a, March thla khan WHO in Covid-19 kai enkawl nan Ivermectin hman chu a tha ngei em tih tihchianna tak a awm lo niin a lo sawi.