Sorkar laipuiin Covid vaccine dose vbc 44 a order belh
Sorkar laipui chuan Serum Institute of India siam Covishield dose vaibelchhe 25 leh Bharat Biotech siam Covaxin dose vaibelchhe 19 lei turin order a siam thar tih NITI Aayog Member (Health) Dr VK Paul chuan Thawhlehni khan a sawi.
Dr Paul chuan order siam thar hi vaccine siamchhuaktu pahnihte hnena a hmaa order an lo siam tawh belhchhahna a ni tih sawiin,kumin January aṭanga July inkarah vaccine dose vaibelchhe 53.6 an supply hman dawn tih a sawi a ni.
"Covishield leh Covaxin order siam thar, dose vaibelchhia 44-te chu August leh December, 2021 inkarah pekchhuah hman a ni ang. Serum Institute of India leh Bharat Biotech hnenah hian vaccine leina tur man 30% pek lawk a ni bawk a ni," tiin, sorkar laipuiin ram puma kum 18- 44 inkarte a thlawna vaccine pek vek a tum avangin order pawh siam belh a la ni dawn tih a sawi.
Dr Paul chuan sawi chhunzawmin, September thlaa peihfel hman tur Biological E vaccine siam, Corbevax dose vaibelchhe 30 pawh lei turin sorkar laipui chuan order a siam tawh bawk a ni, a ti. Corbevax vaccine hi a man tur tihfel a la ni lo a, sorkar leh company hi an inbe mek a ni. Sorkar laipuiin sum a ruahman aṭangin heng vaccine leina tur hi a daih vek dawn tih Dr Paul a sawi bawk.
A hmaa a lo order tawhte chhiar telin, sorkar laipui hnena Covid vaccine supply tur hi a vaiin dose vaibelchhe 127.6 a tling ang.
Ramchhungah coronavirus kai thar an tlahniam zel tih sorkar chuan Thawhlehni khan a sawi a, hripui leng thawh thumna lo thleng thei laka invenna atan sorkar kaihhruaina a siamte chu zawm ṭhat a ṭul a sawi nghal bawk. Hri leng thawh thumna pumpelhna turin, ram mipuiten vaccine an lak kim hma chu Covid-19 laka invenna tura kaihhruaina dante chu zawm ṭha turin mipui a ngen.
Health ministry joint secretary Lav Agarwal chuan hri kai hmuhchhuah tam ber ni, May 7 aṭanga chhutin, nitina hri kai thar hi 79% velin a tlakhniam tawh tih a sawi.
India ramah Covid-19 hri kai hi maktaduai khatah mi 20,822 leh thihpui hi maktaduai khatah 252 zel awm anga chhut a ni a, a rate hi hei khawvel huapin a hniam ber pawl a ni.