Hri lengin naupang a nghawng na dawn tih fiahna awm lo : AIIMS Chief

AIIMS Delhi Director Dr Randeep Guleria chuan Covid-19 hri leng thawh dang lo thleng leh turin naupangte a nghawng na bik dawn tih fiahna, data chu India ramah leh ram dangah pawh a awm lo tih nimin kha a sawi.

Nimina Covid-19 chungchanga joint press conference neihah Dr Guleria chuan he thu hi a sawi a, Covid-19 hri leng thawh dang lo thleng leh tur chuan naupangte na takin a nghawng dawn tia sawi chu thu dik tawk lo a ni tiin, "India leh ram dangah pawh he thil fiahna tur data engmah a awm lo," a ti.

India rama hri leng thawh hnihna thleng mekah naupang hri kai, damdawi-in panpui ngai zinga 60%-70% chu natna dang nei sa leh immunity hniam tak an ni a, naupang hrisel ṭha pangngai zinga hri kaite chu hospital panpui kher ngai loin an dam ṭha leh mai tih a sawi.

Hri kai thar 92,596 awm belh leh
Thawhlehni khan ram pumah Covid-19 hri kai thar 92,596 awm belh lehin, Thawhṭanni aiin hri kai hi an pung leh hret a ni. Mahse positivity rate hi 4.67% la niin, ni hnih chhung chu a zawnin positivity rate hi 5% hnuai lamah a awm.

Hemi ni vek hian hri vanga thi mi 2,219 awmin, India rama Covid-19 vanga thi hi mi 3,53,528 an tling tawh.

Pune-a National Institute of Virology chuan Covid hri inthlak danglam thar, variant thar an hmu chhuak. He variant, B.1.1.28.2 hi a chak a, a kaitea natna langchhuak, symptom pawh a na hle nia sawi a ni. Brazil aṭanga rawn zin mi pahnihte sample endiknaah he variant hi hmuh a ni a, India ram mi zingah erawh kai an la awm lo. Expert-ten hri inthlak danglam awm zel chuan hri kai a tihpun phah a, hei vang hian vaccine pek hna chak zawka kalpui a ṭul tih an sawi.