Hri kai thar tlahniam zel, hri vanga thi an pung

India ramah hri kai an tlahniam zel a, Nilaini khan Covid-19 kai thar 94,052 awm belhin, ramchhunga hri kai hmuhchhuah tawh chu 2,91,83,121 a ni.

Nilaini khan hri vanga thi erawh an puang hle a, mi 6,148 thiin hripui thihpui tawh hi mi 3,59,676 an tling tawh. Test positivity rate chuan tlakhniam lam a pan zel bawk. Positive rate 4.69% a ni mek a, ni thum chhung 5% hnuai lamah a tla thla tawh a ni.

Tamil Nadu-ah hri kai thar 17,321 an awm a, Kerela (16,204) chuan dawtin, Maharashtra (10,989) leh Karnataka (10,959) te chu hri kai hmuhchhuah tamna state- te an ni. Ni 60 hnuah hri kai mek, active case 11,67,952 ah tla thlain, hri kai tawh aṭanga 4% a ni. Recovery rate chu 94.77% a ni tawh bawk.

Bharat Biotech chuan phase 3 trial result July thlaa an tihchhuah hunah Covaxin full licence an dil dawn tih a sawi. He vaccine hi a hman tlak tak tak em tih enchhin nawn a nih leh tur thu company chuan a sawi. Serum Institute of India siam Covishield-in Covaxin aiin antibodies a siam ṭha zawk nia report chungchangah thil dik tawk lo a awm thu a sawi tel bawk a ni.

Sorkar laipuiin State leh Union Territory tan Covid-19 vaccine dose 25,06,41,440 a semchhuak tawh tih Union Health Ministry chuan a sawi. Vaccine semchhuah thawh thumna hi May 1 aṭanga kalpui ṭan a ni. COVID-19 vaccine la tawh tana certificate siamah tihsual a awm loh nan feature thar 'Raise an Issue' tih chu CoWIN platform ah dahbelh a ni. Platform kaltlangin hming, pian kum leh gender te chu www.cowin.gov.in - 'Raise an Issue' ah lutin siamṭhat theih a ni ang.

Bombay high court chuan Nilaini khan sorkar laipui hmalakna chu duhkhawp loin, Covid-19 hri leng chhuah hun nghak tur ang mai a ni tiin, hri leng hi chu 'surgical strike' anga tum mumal tak nei, chhiatna tlem thei ang bera beih let ve tur a nih thu a sawi.

Coronavirus chi dangte pawh pung chho zelin, mithiamte chuan hri inthlak danglam chak venna atan, a rang thei ang bera vaccine pekchhuah chu hmalakna hmasaa nei turin a hrilh.