Higher education-a hmeichhe zirlai awm zat pung zel

India rama higher education institute zirlaite zingah hmeichhia leh mipa inthlauhna chu sawr zim zel a ni a, college zirlai zinga 49% chu hmeichhia an ni tawh tih All India Survey on Higher Education chuan a tarlang.

Kum 2019-2020 inkara survey an neih result chu Ningani khan tichhuakin, kum nga chhung 2015-16 aṭanga 2019-20 inkarah zirlai naupang ziahluh 11.4% in an pung tih a tarlang. Hemi chhunga zirlai hmeichhe ziahluh punna chu 18.2% a ni.

Survey-ah hian higher education-ah hian zirlai maktaduai 38.5 an awm a, chung zingah chuan mipa maktaduai 19.6 leh hmeichhia maktaduai 18.9 an awm tih a sawi. Uttar Pradesh-ah zirlai naupang tam berin, Maharashtra leh Tamil Nadu ten an dawt.

Higher education insitute-a zirlai kum 18-23 gross enrolment ratio (GER) chu 77.1 a ni. Mipa ratio chu 26.9 niin hmeichhe ratio chu 27.3 a ni. Scheduled caste category GER chu 23.4 niin scheduled tribe chu 18.0 a ni.

"Zirna ina inziaklut leh zirna in pung zel te, mipa leh hmeichhia inthlauhna ziaawm zelte hi National Education Policy hmanga ram ṭhanna kawnga kalkawng dik kan zawhna a ni," tiin higher education secretary Amit Khare chuan a sawi.

Kum 2019-20-a GER punna hi 0.8% a ni. Kum 2019-20 chhung khan zirlai zingah higher education kal rual (eligible age group) inziaklut 27.1% an awm a, 2018-19 ah 26.3% leh 2014-15 kumah 24.3% an awm a ni. Kum 2019-20 chhung khan ram pumah higher education-a zirlai inziaklut vaibelchhe 3.85 an awm a, 2018-19 khan vaibelchhe 3.74 an awm a ni.