April 2 hnua hri kai tlem ber ṭum thleng

India ramah kar liam ta Inrinni khan hri kai thar 80,834 awm belh lehin, April 2 hnua hri kai tlem ber ṭum a ni. Khawvel ram hrang hrang zinga Cocvid-19 hri leng tuar na ber dawttu, India ramah hri kai hmuh chhuah tawh hi mi vaibelchhe 2.94 an awm tawh a ni.

Ram chhung state tam zawkah hri leng thawh hnihna chuan ziaawm lam a pan chho zel. Positivity rate pawh tlahniam zelin, 4.25% a ni mek a, ni nga chhung 5% hnuailamah a tla thla tawh.

Hri kai mek, active case pawh mi 10,26,159 ah an tlahniam tawh bawk. Ni 31 chhung chu a zawnin ram pumah hri kai thar aiin dama chhuahtir an tam zawk ziah a ni.

Inrinni vek khan hri kaihhnawihah mi 3,303 an thih belh leh a, hripui thihpui hi nuai 3.70 an awm tawh.

Tamil Nadu state-ah Inrinni khan hri kai 15,108 an awm belh leh a, an state ṭhenawm Kerala (13,832) leh Maharashtra (10,697) ten an dawt.

Sorkar laipui chuan GST council meeting-ah Covid-19 kaihhnawih essential item -damdawi, damdawi-in bungrua leh hri dona atana hmanrua mamawha chhiah lak tihhniam a rel. Covid vaccine-ah erawh chuan GST 5% lak chhunzawn zel a ni ang.

Prime minister Narendra Modi chuan Inrinni khan Covid kaihhnawih technology lama India-in WHO member ramten Agreement on Trade-Related Aspects of Intellectual Property Rights (TRIPS) an lo ziah tawhah ngaihnathiam tura a dilna chu thlawp turin G7 ramte a ngen. Modi hian G7 Outreach session hmasa bera virtual hmanga thu a sawiah, India ramin hri leng thawh hnihna a tawrh meka an puihna avanga lawmawm a tih thu a sawi bawk.

India ramah Covid vang hian January leh May inkar khan mi nuai hnih chuang an thi a, hemi chhung hian ramin hri kai enkawlna kawngah harsatna lian tak tawng chhoin, oxygen indaih lohna pawh a nasa hman hle. Hei vang hian ram hrang hrangin India ṭanpuina hi an rawn thawn a ni. .

State ṭhenkhat chuan hri kai zat dik tak an puangzar lo niin report chuan a tarlang. Kar hmasaa Bihar-a Covid vanga thi zat ennawn a nih hnuah 9,000 chuang an awm nia tarlan a ni.. Ennawn a nih hnuah Bihar-a hri vanga thi zat chhinchhiah hi 72% zetin an pung a, hei vang hian hemi nia hripui thihpui chhinchhuah pawh 6,148 zeta pungin ni khata hri vanga thi tam ber ṭum a nih phah bawk.

Official-a chhinchhiah aiin India rama Covid vanga thi chu a let nga emaw let sarih emaw velin an tam zawk nia report awm chu health ministry chuan a pha a, heng report hi rinthu mai leh, finfiahna engmah awm lo a ni, a ti.