Delhi-ah khuahkhirhna thlahdul

Delhi sorkar chuan hri lengin ziaawm lam a pan tawh avangin vawiin aṭangin khuahhkhirhnate a thlahdul ṭan tawh dawn a; dawr, restaurant leh shopping mall-te pawh nitin inhawn phalsak an ni tawh dawn a ni.

Chief minister Arvind Kejriwal chuan kar khat chhung ruahmanna thar hi hman a ni phawt ang a, hri kai thar an pun chhoh leh erawh chuan khauh takin khuahkhirhna siam leh a ni ang, a ti. Dawr hi zing dar 10 aṭanga zan dar 8 thleng inhawn phalsak an ni ang.

Sorkar office-te pawh dan pangngai angin, thawktu zawng zawngte an kal tawh ang a, private office erawh chu 50% an kal thung ang. Delhi Metro leh bus-te pawh 50% capacity lak phalsak an ni bawk. Zirna in hrang hrangte erawh khar chhunzawm an la ni dawn thung.

Ram chhunga hri leng tuar nasa ber zinga mi, Delhi-ah hian Inrinni khan hri kaithar mi 213 chauh an awm tawh a, thla thum chuang chhunga ni khata hri kai thar an tlem ber ṭum a ni. Hemi ni vek hian hri vanga thi mi 28 an awm bawk.