Thla 2 hnuah hri kai mek nuai 10 hnuai lamah tlahniam ta

India ramah Pathianni khan hri kai thar 70,421 awm belh lehin, ni 74 hnua a tlem ber ṭum a ni a, ram chhungah hri kai hmuh chhuah mi 2,95,10,410 an awm tawh. Thla hnih hnuah a vawi khatna atan hri kai mek, active case nuai 10 hnuai lamah a tla thla ta tih Union Health Ministry chuan nimin khan a puang. Hri kai mek hi mi 9,73,158 (3.30%) an awm a, hri kai enkawl dam recovery rate chu 95.43% ah a kang chho leh a ni.

Covid-19 vanga thi mi 3,921 an awm belh bawk a, heng mite nen hian India rama hripui vang thi chu mi 3,74,305 an tling tawh.

Pathiannia hri kai thar hi a hma ni aiin 53,001 in an tlahniam a, ram pumah hri kai hmuhchhuah thar hian tlakhniam lam a pan zel a ni.

Pathianni vek khan Covid-19 test 14,92,152 kalpui ni lehin, ramchhunga test zat chu 37,96,24,626 a ni. Nitina test neih aṭanga hri kai hmuh chhuah, positivity rate chu 4.72% a ni. Ministry chuan ni 21 chhung 10% hnuailamah a tla thla tawh tih a sawi. Kar tina positivity rate pawh tlahniam zelin, 4.54% a ni. Ni 32 chhungin hri kai thar aiin dama chhuahtir an tam tawh zawk bawk. Hetih lai hian hripui vanga thi, fatality rate 1.27% ah a sang chho thung.

Ram puma Covid vaccine pek chhuah runpui, national vaccination drive kaltlangin vaccine dose 25,48,49,301 semchhuah a ni tawh.

India ramah nikum August 7 khan Covid-19 hri kai hmuh chhuah hi mi nuai 20 an tling chho a, August 23-ah nuai 30, September 5-ah nuai 40, September 16-ah nuai 50, September 28-ah nuai 60, October 11-ah nuai 70, October 29-ah nuai 80, November 20-ah nuai 90 leh December 19 khan vaibelchhe khat a kai. Kumin May 4 khan hri kai zat hian vaibelchhe hnih a tling a ni.