Vaccine la zingah harsatna nei 26,000 chuang awm

Sorkar laipui data-in a tarlan danin, ram chhunga Covid-19 vaccine pek chhuah hna kalpui a nih aṭangin vaccine la tawh zingah harsatna nei, Adverse Events Following Immunisation (AEFI) case 26,000 chuang report a ni a, mi 488 an thi.

January 16 leh June 7 inkar data lakkhawm aṭangin he report hi siam a ni. June 7 thleng khan vaccine la hi mi vaibelchhe 23.5 an awm. Vaccine la zinga harsatna nei, AEFI case nei hi 0.01% an ni.

Ni 143 vaccine pek chhuah kalpui a nih chhung hian, vaccine latu mi 10,000 zelah mi pakhatin harsatna an nei a, vaccine la tawh mi nuai 10 zela pahnih an thi a ni.

Data lakkhawm aṭanga a lan danin, Covishield la zinga AEFI case awm hi 24,703 (94%) niin, Covaxin vaccine la zingah 1,497 an awm a ni. January 16 - June 7 chhungin Covishield hi dose vaibelchhe 21 pek chhuah a ni tawh a, Covaxin hi dose vaibelchhe 2.5 pek chhuah a ni thung.

AEFI case hi chi thum a awm a, common and minor case-ah chuan injection lak hnua khawsik, taksa na leh vung neiin mahse reiloteah a reh ve leh mai a ni. Severe case-ah chuan khawsik sang tak neiin, ruk chuhtuah na, vung leh thawk lama harsatnate` an nei. Serious case-ah chuan damdawi-in panpui ngai khawpin an chau a, che ṭha thei loa awmin thihna hial pawh a thlen thei a ni.

Report tihchhuahah hian AEFI case nei zinga 95% vel chu minor case an ni a, severe case 2% awmin serious case 3.39% an awm. Vaccine lak vanga damdawi-in luhpui ngai hi mi 2,318 (8.85%) an awm.