UP-in Jal Jeevan Mission hnuaiah Rs vbc 10,870 dawng dawn

Sorkar laipui chuan Uttar Pradesh-a Jal Jeevan Mission kalpuina turin kum 2021-22 atan cheng vaibelchhe 10,870 a pe dawn tih ministry of Jal Shakti chuan a sawi a, hei hi he mission hnuaia state pakhat tana sum pek chhuah tam ber a ni.

Nakkuma assembly inthlang tur, Uttar Pradesh-in sum dawn tur hi sorkar laipuiin nikuma a sum pek aiin a let li zetin a tam.

Jal Sṭhakti ministry chuan, "Sorkar laipui chuan Jal Jeeven Mission kalpuina tura Uttar Pradesh tana sum pek tur chu tipungin Rs vbc 10,870.50 a pe dawn. Kum 2019-20 atan khan Rs vbc 1,206 pek niin, kum 2020-21-ah Rs vbc 2,571 pek a ni," a ti.

Ministry hian kar liamta khan Jal Jeevan Mission hnuaiah West Bengal tan Rs vbc 6,998.97 pek a ni dawn tih a lo puang tawh bawk. Gujarat tan Rs vbc 3,410 leh Madhya Pradesh tan Rs vbc 5,117 ruahman a ni..Hmarchhak state-te tan Rs vbc 9,262 pek a ni. Jal Jeevan Mission hnuaiah hian Maharashtra tan Rs vbc 7,064.41 leh Chhattisgarh tan Rs vbc 1,908.96 ruahman sak an ni bawk.

Jal Jeevan Mission hnuaiah hian thingtlang in tin hnenah kum 2024 ral hmain tap water connection pek vek tum a ni. Union budget 2021-22 ah he scheme atan hian Rs vaibelchhe 50,000 dah a ni.

Union Jal Shakti Minister Gajendra Singh Shekhawat chuan Uttar Pradesh chief minister Yogi Adityanath nena an inkawmnaah, an state-a Jal Jeevan Mission kaltlanpuina turah a theih anga puih a intiam.

UP CM Adityanath chuan Prime Minister Narendra Modi-a'n August 15, 2019-a scheme a tlangzarh ṭum a sawi ang khan, kum 2024-ah chuan an state-a thingtlang khua in tinah tap water connection pek hman an tum tih a sawi.

Uttar Pradesh-a thingtlang khua 97,000 -ah chhungkua vaibelchhia 2.63 an awm a, chung zinga nuai 30.04 (11%) te chuan an inah tui an herh haw thei tawh a ni. Chhungkua nuai 5.16 (1.96%) te chauhin scheme kalpui hma hian connection an nei hman. Thla 21 liamta chhung khan Jal Jeevan Mission kaltlangin state sorkar chuan chhungkua nuai 24.89 (9.45%) hnenah tap water supply a pe tawh a ni.