Punjab police-ten SAD hotu man

Punjab police-te chuan Shiromani Akali Dal (SAD) hotu Sukhbir Singh chu nimina Chandigarh-a chief minister Captain Amarinder Singh chenna in bula nawrh a huaihawt laiin an man.

Sukhhir Singh hian state chhunga Covid vaccine hralhchhuah danah leh hri kaite enkawlna tur medical kits lei danah thil dik tawk lo a awm nia sawiin, health minister Balbir Singh Sidhu chu ban turin a phut a ni. Dik lo taka thiltih a nih dan chu CBI chhui a phut bawk.

Nimina SAD-in nawrh an huaihawtah hian BSP punjab president Jasvir Singh pawhin a telpui a ni. Nawrh huaihawta pungkhawmte hian police-ten daidanna an siamte chu an tawn tlang lui a, police-te chuan mipuite hnawhdarh nan hian water cannon an hmang.

Thawhṭanni khan Aam Aadmi Party (AAP) chuan Punjab sorkarin post-matric scholarship fund a pek tur chu tihchingpen nia sawiin CM chenna in bulah nawrh an lo huaihawt tawh bawk. AAP chuan cabinet minister Sadhu Singh Dharamsot chu ban turin an phut a, schedule caste-te tana post-matric scholarship pek tur tihkhawtlai mek pawh pe chhuak nghal turin state sorkar chu an phut bawk. Nawrh huaihawtnaa tel AAP hruaitu eng emaw zat chu police-ten an man a, mahse a hnu rei loteah an chhuah zui leh nghal an ni.