Parliamentary committee-in insawifiah turin Twitter ko

Sorkar laipuiin IT rules a siamthar Twitter lamin an bawhzui duh loh vanga buaina kalzelah, Parliamentary Standing Committee for Information and Technology chuan June 18 tlai dar 4-ah insawifiah turin Twitter a ko.

Parliamentary Standing Committee on Information and Technology hian June 18 tlai dar 4-ah Parliament Complex-a panel member hmaa inlan tura koin, social media leh online news hman sual laka inven dan turte sawifiah tura tih a ni.

Tunhnai khan sorkar laipui hian Twitter hnenah IT rules thar zawm tur hian hriattirna a lo pe tawh bawk.

"Ministry-in lehkha vawi eng emaw zat a thawn hnuah pawh Twitter lam hian chhanna mumal tak an pe thei lo a ni," tiin Rakesh Maheshwari, Ministry of Electronics group coordinator for cyberlaw and Information Technology (MeitY) chuan a sawi. Twitter lam hian IT rules thar chungchanga ṭum eng emaw zat hriattir an nih hnuah dan thar hi zawm an tiam tawh a ni.

"Twitter hian India tan theihtawp a chhuah ṭhin. India sorkarin inkaihhruaina a siamte zawm ngei kan tum tih pawh kan sawi duh a, kan hmalakna te pawh kan hriattir a ni. Sorkar nen hian inbiakna hi kan nei chhunzawm zel ang, " tiin Twitter thupuangtu chuan a sawi.

Hetih lai hian panel member-te chuan engvangin nge Twitter hian IT rules thar hi a zawm nghal mai theih loh chhan an zawt chiang dawn nia sawi a ni.

Parliamentary committee chuan thil hrang hrangah vawi enge maw zat insawifiah turin Twitter hi a lo ko tawh a ni.