India ramah hri kai thar zat tlahniam zel

India ramah nitina hri kai thar hmuhchhuah chuan tlakhniam lam a pan zel. Thawhlehnia hri kai thar chu mi 62,224 niin, May 7-a hri kai hmuhchhuah tam ber ni nena chhut chuan a tlakhniamna hi 85% dawn a tling pha tawh a ni.

Ni kua chhung chu a zawnin hri kai thar hi nuai khat tling lo an ni tawh bawk. June 15-a hri kai thar hmuhchhuah mi 60,461 kha kumin March 29 hnu lama ni khatah hri kai thar an tlem ber ṭum a la ni.

Hri kai mek, active case pawh nuai kua tling lo an ni tawh bawk.

Ram pum huapa nitina test neih aṭanga hri kai hmuh chhuah thar, positivity rate chu 3.22%-ah a tla thla tawh a, ni kua chhung chu a zawnin positivity rate hi 5% hnuai lam a ni tawh a ni. Kar khat chhunga positive hmuh chhuah, weekly positivity rate pawh 4.17% ah a tla tawh a ni.

Ni 34 chhung chu hri kai thar aiin enkawl dam an tam tawh zawk bawk a, hri kai enkawl dam tawh hi 2,83,88,100 an tling tawh a, recovery rate hi 95.80% a tling tawh.

Thawhlehni hian hripui vanga thi mi 2,542 awm belh lehin, India rama Covid-19 vanga thi hi mi 3,79,573 an tling tawh a, fatality rate hi 1.38% a ni.

US chu khawvela Covid-19 hri kai leh thihpui tamna ber ram a la ni zel a, US dawtah India chu hri kai tamna a ni thung. US leh India bakah Covid-19 hri kai maktaduai thum chuang hmuh chhuah tawhna ramte chu - Brazil (17,533,221), France (5,806,255), Turkey (5,342,028), Russia (5,176,051), the UK (4,596,987), Italy (4,247,032), Argentina (4,172,742), Colombia (3,802,052), Spain (3,745,199), Germany (3,725,383) leh Iran (3,049,648) te an ni.

Vaccine la tur tan online registration/booking tih lawk ngai lo
Union health ministry chuan kum 18 chin, Covid vaccine la tur tan CoWIN-a registration leh booking lo tih lawk kher a ngai lo tih sawiin, vaccination centre hnai berah kalin a hmunah registration tihchawp a, vaccine lak theih nghal a nih thu a sawi.

Expert-te chuan ram mipui zinga a tam ber, kum 18-44 inkarte vaccine pek tam chu hri leng vanga khuahkhirhna siamte thlahdul theihna leh, economic leh commercial activity-te kalpui chhoh leh theihna pawimawh a ni tih an sawi. Hei vang hian vaccine pawh a tam thei ang pek thuai a ṭul thu an sawi a ni.

Hetih lai hian vaccine hlau, lak hreh mi tam tak an awm tih sorkar chuan sawiin, hei hi ramdangah pawh thil thleng ve tho a ni tih a sawi. Hei vang hian tualchhungah vaccine chungchang pawh zirchianna neih behchhana inzirtir ṭhat a ṭul thu a sawi.

Indian Council of Medical Research-in a tarlan danin, Thawhlehni bik khan vaccine hi mi 28,00,458 hnenah pek a ni a, ram pumah vaccine dose 26,19,72,014 pek chhuah a ni tawh a ni.