Scientific evidence behchhanin vaccine lak inkar hi siam a ni : Govt panel

Central government panel, National Technical Advisory Group on Immunization (NTAGI) chuan Covid vaccine, Covishield dose khatna leh hnihna lak hun inkar pawhsei chu scientific evidence behchhana an siam a ni tih sawiin, langtlang takin thil an kalpui tih a sawi.

NTAGI chairman Dr NK Arora chuan vaccine hnathawh dan hi ennawn a, zirchian reng a nih thu sawiin, a kar inhnaih zawka lak hi mipuite tan a ṭha zawk nia a lan chuan Committee chuan a ṭul angin a rel leh mai dawn a ni, a ti. Hemi rual hian tuna hman mek hi ṭha zawk a nih chuan hman chhunzawm zel a ni ang, a ti.

Sorkar laipui chuan May 13 khan COVID-19 Working Group rawtna siam angi, Covishield vaccine dose hnih lak inkar hlat lam, kar 6-8 tih chu kar 12-16-ah a pawtsei a ni. Hemi chungchang hian sawizui a hlawh a, vaccine indaih lohna thupna atan he ruahmanna hi siam nia sorkar puhnate a awm.

Mahse Health Ministry chuan hemi chungchangah hian thuchhuah siamin, "A taka tawnhriat neite zirchianna neih aṭangin, Covid-19 Working Group hian dose hnih lak inkar hi kar 12-16 a pawhsei hi a rawt a ni. Covaxin bikah erawh chuan pawhsei rawtna hi a awm lo," a ti.

UK-ah pawh vaccine lak inkar hi kar 12-ah ruat a ni a, April thlaa Public Health England-in data a tihchhuahah khan, kar 12 inkar dana lak hian vaccine hnathawh chu 65-88% inkar velin a sawt zawk niin a lo tarlang tawh a ni.