BJP-ah Jyotiraditya Scindia a lut ta

Madhya Pradesh-a Congress party senior leader Jyotiraditya Scindia chuan Congress party aṭanga banna a thehluh hnuin, nimin khan New Delhi-ah BJP party a zawm ta. 

Congress president hlui, Rahul Gandhi nen pawha inpawh ṭha tak, Jyotiraditya Scindia hian kum 18 zet Congress party tana a thawh hnuah, Thawhlehni zing khan prime minister Narendra Modi leh union home minister Amit Shah-te hmuin, a hnu lawkah Congress party aṭanga a ban thu hi a puang zui a ni. A twitter-ah Congress interim president Sonia Gandhi hnena banna lehkha a thehluh pawh tarlangin, 'bul ṭan thar' a duh tiin a sawi. Congress MLA 21 pawhin Madhya Pradesh chief minister Kamal Nath lakah helin Scindia  hi an thlawp a, banna pawh an thehlut ve nghal. Mahse heng MLA-te hian BJP an zawm ve dawn leh dawn loh erawh tihchian a la ni lo. 

New Delhi-a BJP head­quarters-ah nimin khan Scindia hi lak luh a ni. BJP hian a hmain Scindia hi Madhya Pradesh-a Rajya Sabha inthlan neih tura can­didate atana dah leh, thlan tlin a nih chuan union minister-ah dah an tiam nia sawi a ni. BJP member atana lakluh a ni hnua thu a sawiah, Scindia chuan Congress chu a hma ang kha a ni tawh lo a, party chhung aṭangin an state leh ram rawngbawl hna chu a thawk chhunzawm thei tawh lo tih a sawi. PM Modi leh Amit Shah-ten BJP chhungkua an lo lawm lut chu lawmthu a sawi nghal bawk. 

Scindia pa, Madhavrao Scindia hi Congress hruaitu hlun niin Rajiv Gandhi leh PV Narasimha Rao-te prime minister-na hnuaiah khan union minister pawh a lo ni tawh a, kum 2001 khan a thi. Hetih lai hian a pi, Vijayraje Scindia chu BJP dintu zingah a tel thung a, a nite pahnih  Vasundhara Raje leh Yashodhara Raje pawh BJP hruaitu pawimawh tak an ni bawk. 

Madhya Pradesh politics buaina thleng vang hian Congress leh BJP chuan an party MLA te chu an khung hrang nghal. BJP hian Gurgaon-a five-star ITC Grand Bharat ah an MLA-te chu dahin, Congress hian Rajasthan-a Jaipur lamah an dah khawm bawk. 

Congress chuan Scindia thlawptu Congress MLA zinga 19-te chuan BJP hi zawm ve an tum lo tih a sawi. CM Kamal Nath chuan a kaihhruai sorkar tan hlauhthawn tur a awm lo a, House-ah pawh thlawptu an ngah tawk tih an lantir dawn tih a sawi. 

Member 230 awmna, Madhya Pradesh Assembly-ah hian Congress kaihhruai sorkar hian thlawptu MLA 120 a nei a, majority ngai zat 116 aiin seat liin an khum a ni. Mahse rorellai MLA hel 21-te banna thehluh hi pawmsak an nih chuan, House member zat hi 209-ah tla hniamin, majority nei turin MLA 104 neih a ngai ang. BJP hian party mala MLA 107 a neih avangin MLA te banna hi pawm a nih chuan sorkar thar hi an siam thei nghal dawn a ni.