CAA dodalnaa silai lektu police custody-ah awm belh dawn

Delhi hmarchhaka Citizenship Amendment Act (CAA) dodaltute leh thlawptute inkarah buaina a thlen ṭuma CAA do tute lam leh police lama silai lekchhuaktu, Shahrukh Pathan chu police custody-ah ni 14 thleng awm belh turin Delhi-a Karkardooma district court chuan thutlukna a siam.

Kum 23 mi Shahrukh hi police custody-a thuzawh fiah tura kawl lai mek a ni a, kar liam ta khan custody-a a awm hun chhung hi ni 3 atan pawhsei tawh a ni. Hemi hnua ni 3 a pelh leh tawh avangin, Delhi Police Crime Branch-te chuan court-ah an inlanpui a, court chuan Shahrukh hi police custody-ah ni 14 thleng awm belh turin a ti ta a ni. 

March 3 khan Delhi police-te chuan Shahrukh hi Uttar Pradesh-a Shamli district-ah an man a, Delhi hmarchhaka Ghonda venga cheng a ni. February 24-a Delhi hmarchhaka CAA dona boruak zualkai laia silai lek chhuaktu a ni a, Shahrukh hian police head  constable lam hawi  leh CAA dotute lam hawi zawngin silai hi a tin a ni. Kha mi ṭum khan Shahrukh hian silai vawi thum a hmet puak tih police-te chuan an sawi. 

A tirah chuan a silai hi Yamuna luia a paih thu Shahrukh hian police-te a hrilh a, mahse a hnuah thudik sawiin a chennaa a awm thu police-te a hrilh. Silai a kap lai thlalak leh video ṭhenkhatte social media lama a darh hnuah Shahrukh hian a sahimna zawngin a kawr hak laite a thlak nghal a, chumi hnuah Delhi a chhuahsan zui ta a ni. February 24-a Delhi hmarchhak lama Citizenship Amendment Act (CAA) dodaltute leh thlawptute inkarah buaina nasa tak chhuakah khan, mi 53 an thi a, mi 250 chuangin hliam an tuar bawk.