Kerala-ah Covid-19 kai thar pariat awm Mipui punkhawm khap

Kerala-ah mi pariatin Covid-19 an kai thar tih hriat chhuah belh a ni a, Kerala state-ah bik hian mi 14-in an kai tawh a ni. Covid-19 vang hian Kerala-ah mipui punkhawm  khap a ni bawk. Hri kai hriatchhuah thar mi pariatte hi an chhungte Italy aṭanga rawn haw ten an kai nia hriat a ni. Hri kai zinga pathumte hi nupa leh an fa an ni a, Italy aṭanga India-a thlawhtheihna ṭumhmun an rawn thlen hnuah enfiah an ni. Rinhlelh an nih avangin damdawi-in lama dah zui an ni bawk. Nupate hian an kai tih hriat a ni a, an fa naupang kum 3 mi pawhin he hri leng mek hi a kai theih hriatchhuah zui a ni. 

Mi dang parukte hi an chhungte Italy aṭanga rawn hawngin a kai darh a nih an ring bawk. Kerala-ah hian mi 14-in Covid 19 hri hi an kai tawh a ni. Hei vang hian Kerala chief minister Pinarayi Vijayan chuan March 31 thleng an state pumah mipui punkhawm a khap a ni. Tun thla chhung atan zirna in pawh, class 7 chin chu khar a ni a, hei vang hian exam-te pawh ṭulh a ni dawn. Class 8-12 inkar chu exam tur tih a ni a, mahse he hri kai nia rinhlelh an awm chuan exam ṭhulh tura tih a ni. Tun thla chhung hian College pawh khar tur a ni bawk.  

Hriat theih chinah India-ah Covid-19 kai hi mi 60 an tling tawh a, thihpui erawh an la awm lo. India rama he hri kai mi 60 zinga mi 16-te chu Italy mi an ni a, a dangte chu India mi an ni.