Bihar-ah Covid-19 vanga thi 154% in an pung

India ramah May 16 aṭang khan state pathum - Bihar, Kerala leh Assam-a coronavirus kaihhnawiha thi 80% chunglamah a kai chho tawh tih official data chuan a tarlang. Hetih lai hian ram pumah hri kai thar hmuhchhuah zat erawhin tlakhniam lam a pan tawh thung.

Union health ministry data-ah a lan danin, Bihar-a hri avanga thi punna chu 154.18% a tling. A punna a sanna chhan hi Bihar health department-in kar hmasaa Covid-19 vanga thi chhinchhiah zat a ennawn hnuah, a hmaa chhiar tel loh, hri vanga thi ni si mi 3,951 te a chhiar tel leh tak vang a ni. Hemi hnu hian hripui vanga thi chhinchhiah hi mi 9,514 ah a pung chho tawh a ni.

State 20 aṭanga zirchianna neihah, May thla chhung khan state pariatah hri kai vanga thi hi 40% aia tamin a pung bawk.

Assam-ah chuan May 16 thleng khan Covid-19 vanga thi mi 2,123 an awm a, Nilaini khan thi zat hi 4,028 tling chho tawhin, hri vanga thi punna 90% vel a tling. Kerala (81.5%), Tamil Nadu (73.21%) leh Karnataka (55%) te chu hri vanga thi pun tamna state an ni bawk a ni.

Kerala-ah chuan May 16-ah hripui vanga thi mi 6,339 an awm laiin, ni 30 hnuah chuan mi 11,508-ah an pung tawh.

Tamil Nadu-ah pawh May 16 thleng khan hri vanga thi 17,359 an awm a, June 16-ah chuan thi zat hi 30,068 ah a pung chho a, Karnataka-ah ni 30 chhungin hri vanga thi hi mi 21,434 aṭangin 33,148 in a pung chho leh bawk a ni.

Hri vanga thi pun tamna zingah Uttarakhand (51%), Odisha (48%) leh Maharashtra (42%) te an tel bawk.

Uttarakhand chuan May 16 thleng khan Covid-19 vanga thi 4,600 an awm tawh a, thla khat hnuah mi 7,000 dawnah an pung tawh a ni.

Odisha chuan thla khat chhungin hripui thihpui hi mi 2,300 aṭangin 3,400 -ah an pung bawk.

Bihar ang bawk hian Maharashtra chuan Covid-19 vanga thi chhinchhiahte ennawn lehin, kar hmasa khan hri vanga thi, chhinchhiahnaa tel loh mi 2,288-te a chhiar tel ṭha leh bawk. Heng mite nen hian thla khat chhunga hripui thihpui zat hi mi 33,642 awm belh lehin, hri vanga thi belhkhawm chu nuai 1.14 an tling tawh a ni. Maharashtra hi India rama coronavirus vanga thi tam berna leh hri vanga thi mi nuai khat tlinna awmchhun a la ni.

Haryana, Punjab leh Rajasthan-a thla khat chhunga hri vanga thi punna chu 33% a ni a, Uttar Pradesh, West Bengal leh Andhra Pradesh-a thi punna hi 25% chunglam vek a ni bawk.

State zingah thla khat chhunga Covid-19 thihpui tlemna te chu Telangana (20%), Delhi (17%), Chhattisgarh leh Jharkhand (15%) leh Gujarat (10.7%) te an ni.

Zirchianna neihna state 20 zingah hian Telengana-ah (3,510) thihpui an tlem ber a, Maharashtra-ah tam berin thi nuai khat chuang an awm.

Karnataka leh Tamil Nadu-ah thi 30,000 chuang an awm tawh a, Delhi chu palina niin, Covid-19 vanga thi mi 25,000 dawn an awm tawh.

May 16 leh June 16 inkarah India ram puma coronavirus vanga thi punna hi 40.43% niin, thi zat hi nuai 2.70 aṭangin nuai 3.79-ah an pung. Ni 30 chhung khan hri vanga thi nuai chuang an awm a ni.

May 16-June 16 chhung hian ram pumah hri kai hmuhchhuah 20% in a pung bawk a, thla khat chhungin hri kai hi vaibelchhe 2.46 aṭangin 2.96-ah an pung hman.

May 16 khan hri kai mek, active case nuai 36.18 an awm. June 16, Nilaini khan 77.33% ah tla thlain, hri kai mek nuai 8.65 an awm.