BJP aṭanga TMC-a Mukul Roy a kir hnuah MHA-in Z security cover a tihtawp sak

Ministry of Home Affairs (MHA) chuan tunhnai BJP aṭanga Trinamool Congress (TMC) party-a kir leh, Mukul Roy-a Z security cover pek chu a tihtawp sak nghal.

CRPR official-te chuan nimin zing khan Roy vengtu, an mi leh sate chu kohkir nghal vek an ni tawh tih a sawi.

Mukul Roy hian kum 2017 khan TMC aṭangin BJP a zawm a, party national vice president pawh a ni hman a ni. West Bengal assembly inthlan neihah khan Khirsnagar Uttar constituency aṭangin BJP candidate-in thlan tlin a ni. Inthlan hma khan TMC mi leh sa laka venhim a ngai nia sawiin Z security pek a ni a, CRPF sipai 33 in an veng a ni.

BJP national general secretary aṭanga ban a nih hnuah, Roy hian BJP chhuahsanin TMC-ah a kir leh a, TMC-a a awm hnuah MHA hnenah venhimna pek chu titawpsak turin a ngen a, fapa Subhrangshu Roy hnena Y security pek pawh kar liam ta khan tihtawp a ni tawh bawk.

Mamata Banerjee kaihhruai, West Bengal-a Trinamool Congress sorkar chuan Mukul-te pafa hi TMC-a an kir leh hnu hian venhimna a lo pe thung a ni.