Ni 73 hnuah hri kai mek nuai riat hnuailamah tla thla tawh

India ramah Ningani khan Covid-19 kai thar 62,480 an awm a, ni 36 chhung chu nitin hri kai thar aiin dama chhuahtir an tam tawh zawk. Hri kai mek, active case chu ni 73 hnuah nuai riat hnuai lamah thla thlain 7,98,656 an awm mek.

India ramah test aṭanga positive hmuhchhuah zat pawh a tlahniam ve zel a, tunah hian 3.24% a ni mek. Ni 11 chhung 5% hnuailamah a tla thla tawh.

Maharashtra chu ramchhunga hri kai tamna ber a la ni chhunzawm zel. Karnataka, Kerala, Tamil Nadu leh Andhra Pradesh-te chuan an dawt a ni.

Ramchhunga vaccine semchhuah kalpui mekah vaccine dose vaibelchhe 26.89 semchhuah a ni tawh bawk.

State leh union territory 20-ah Covid kai mek 5,000 aiin an tlem tawh a, state tin deuh thawah hri kai nasa takin an tlahniam a ni.

Serum Institute of India chuan ramchhunga hman atan COVID-19 vaccine Covovax chu naupang hman theih turin, thla leh aṭang hian enchhinna an nei ṭan dawn tih Ningani khan a sawi.

India ramchhunga siam, Biological-E vaccine chuan an vaccine siam chuan Covid hri lakah 90% velin a ven theih an beisei. Vaccine hi trial phase 3 an kal pui mek a, October thlaa hman theih tura beisei a nih thu Centre Covid Working Group chairperson, NK Arora chuan a sawi.

Uttarakhand sorkar chuan Ningani khan April-a Haridwar Kumbh Mela aṭanga coronavirus test report lem an pekchhuah avangin company leh private lab pahnih lakah complain an thehlut.

Russian Direct Investment Fund (RDIF) chuan Covid-19 vaccine Sputnik V dose hnihna an lak tawh hnuah emaw, booster shot an lakin coronavirus Delta variant lakah a veng thei dawn tih a sawi. Sputnik hi ramchhunga vaccine semchhuah pathumna ni turin April thla aṭang khan India ramah emergency-a hman atan phalna pek an ni.