June 24-ah Mamata petition thehluh ngaihtuah dawn

Calcutta High Court chuan West Bengal chief minister Mamata Banerjee-in an state assembly inthlan hnuhnung bera Nandigram bial aṭanga BJP candidate, Suvendu Adhikari thlan tlin a nih chungchanga petition a thehluh chu June 24-ah a ngaihtuah dawn.

High Court bench chuan nimin khan Mamata petition thehluh hi ngaihtuah a tum a, mahse Mamata inlan loa a lawyer zawk a inlan avangin, June 24-a ngaihtuah turin a ti a ni. Justice Kaushik Chanda chuan election petition a nih avangin, hearing neih hmasa berah petition thehluttu hi a inlan a ngai a ni, a ti.

March-April thla chhunga West Bengal assembly inthlan neihah khan, Nandigram bialah hian Mamata Banerjee leh a thawhpui ṭhin, BJP-a inpe ta Suvendu Adhikari hi an inkhing a ni. Inthlan result chhiar a nih khan a tirah Mamata hi chaka puan a ni hman a, mahse a hnuah Adhikari zawk chu vote tlemtein a chak tih puan a ni leh ta zawk a ni. Adhikari hi West Bengal assembly-ah leader of opposition a ni mek a ni.

Mamata Banerjee chuan vote tlate chhiar ṭha leh tur a ngenna chu Election Commission-in a hnawlsak avang leh, EVM khawlte tihchingpen nia sawiin court-ah hian petition a thehlut zui a ni.