Covid frontline worker-te training pekna programme PM-in a hawng

Prime minister Narendra Modi chuan hripui leng mek dona kawnga a hma tawngtu, Covid frontline worker nuai khat hnena training pekna tur programme, ‘Customised Crash Course programme for COVID-19 Frontline workers' chu nimin khan video conference kaltlangin a hawng.

PM Modi chuan coronavirus hrik chu a inthlak danglam reng vangin hri do chu a hautak hle a, hemi atan hian a hmatawngtu, 'Corona warrior'-te chu zirtirna pekna tur programme hi duan a ni, a ti. "Hri hi kan zingah a la awm reng a, a la inthlak danglam thei reng a ni," tiin a sawi.

Hri leng do hna thawk mektu task force-te pui turin ṭhalai nuai khatte training pek an ni dawn tih Modi chuan a sawi. Course hi thla 2-3 velah zawh a ni ang a, hemi hnu hian hna hi an thawk nghal thei dawn a ni, a ti.

‘Customised Crash Course programme for COVID-19 Frontline workers' hmang hian candidate-te chu a thlawnin training pek an ni dawn a, ei tur leh awmna turte buatsaih sak vek niin, an training chhungin stipend pek an ni ang a, Skill India certificate pek niin, accident insurance Rs nuai 2 tihsak vek an ni bawk ang.

He course hi Pradhan Mantri Kaushal Vikas Yojana 3.0 hnuaia special programme-a duan a ni a, hemi atan hian cheng vaibelchhe 276 ruahman a nih thu Prime Minister Office chuan a sawi. He programme hmang hian non-medical healthcare worker-te chu health sector-a thawktu indaih loh palh pawha hman theih turin chher chhuah an ni dawn a ni.