Ni 81 hnuah Covid kai thar 60,000 aiin tlem ta

India rama Covid-19 hri leng thawh hnihna chuan ziaawm lam pan chho zelin Inrinni liam ta khan hri kai thar 58,419 an awm a, ni 81 hnua hri kai an tlem ber ṭum a ni.

Ram pumah Covid-19 kai vaibelchhe 2.98 hmuhchhuah an awm tawh a, hri kai tawh aṭanga chhutin hri kai mek, active case 2.44% an awm.

Inrinni khan hri kai 30,776 in an tlahniam a, hri kai mek 7,29,243 an awm. Hri kai thar aiin dama chhuahtir chu ni 38 chhung a zawnin an tam tawh zawk a ni.

Kerala chu ramchhunga hri kai hmuhchhuah tamna ber state niin, mi 12,443 hmuhchhuah an awm. Maharashtra (8,912) leh Tamil Nadu (8,183) te'n an dawt.

January 16-a vaccine sem­chhuah anih aṭangin ram­chhung­ah vaccine dose vaibelchhe 27 chuang semchhuah a nih tawh tih sorkar chuan a sawi. Kum 18-44 inkar tan vaccine dose vaibelchhe 5.5 chuang semchhuah a ni tawh bawk.

Ramchhungah hri kaih­hnawiha thi 1,576 awm belh leh mah se ni 63 hnua a tlem ber ni a ni thung. Heng mite nen hian hri vanga thi nuai 3.86 an awm tawh a ni. Mahse Bihar leh Maharashtra-ah hri vanga thi chungchanga report dik lo thehluh a awm avangin hei ai hian thi an tam rin a ni thung.

Bihar High Court chuan chief minister Nitish Kumar kaihhruai sorkar lakah inrinni khan an state chhunga Covid len chhunga thi zat an puanzar hrehna chhan a zawt chiang. Tunhnai khan Bihar-ah hian Covid-19 vanga thi zat an puanzar ṭhat duh loh avangin rinhlelhna a nasa chho hle. NDTV chuan thla nga liamta chhung khan mi 75,000 dawn thite chu an thih chhan sawichian a ni lo tih a tarlang.

State tam tak chuan hri kai thar an tlakhniam zel avangin hri kaihhnawiha khuahkhirhna siamte an thlahdul tawh a ni. Telengana sorkar chuan Inrinni khan zirna in zawng zawngte chu July 1 aṭanga an hawn leh tur thu a puang.

Sorkar laipui erawh chuan state zawng zawngte chu Covid-appropriate behaviour, test-track-treat leh hun lo la kal zel tura hri leng darh zel tur chhut chah nan vaccine semchhuah ngai pawimawh turin a chah.

India rama hri leng thawh thumna chu pumpelh theih a ni dawn lo a, tun aṭanga kar ruk - kar riat inkarah a thlen theih thu sawiin, ramchhunga chona lian ber chu mipui tam tak hnena vaccine semchhuah a ni tiin AIIMS chief Dr Randeep Guleria chuan chuan a sawi.