Covid vanga thite chhinchhiah vek tur a ni : Sorkar laipui

Sorkar laipui chuan Surpeme Court-a affidavit a thehluhah, coronavirus kaihhnawiha thite chu khawi hmuna thi pawh ni se Covid vanga thi tia chhinchhiah an ni vek tur a ni, a ti.

State ṭhenkhatah Covid vanga thi chhinchhiah danah thil fel tawk lo a awm nia media report a awm avangin, Inrinni zan khan sorkar laipui chuan Supreme Court-ah hian phek 183-a chhah affidavit hi a thehlut a ni. Covid vanga thite chhinchhiah tura dan a siam zawm lo doctor-te chungah action lak a nih tur thu a sawi lang bawk.

Covid hri kai, damdawi-ina thite chauh chu Covid vanga thi chhinchhiahnaah hian ziahlan nia sawi a ni a, hetih lai hian hri kai zingah in lam leh damdawi-in pawn lama thite chu a chhinchhiah tel lo tih report ṭhenkhat chuan an sawi. Hei vang hian hri vanga thi chhinchhiah pawh a inmil lo fo nia sawi a ni.

State ṭhenkhat chuan Covid vanga thi chhungte hnenah zangnadawmna an pe a, mahse damdawi-in pawn lama thi tam tak chu Covid vanga thi anga chhinchhiah an nih loh avangin an chhungte hian zangnadawmna hi an dawng ve thei lo tih an sawi.

Supreme Court chuan hri vanga thi ṭhenkhat chu death certificate-a an thih chhanah chuap leh lung ṭha lo vang titea ziak an ni a, hei vang hian coronavirus vanga thite death certificate-ah an thih chhan ziah dan tura sorkarin policy emaw, guideline emaw a siam em tih a zawt a ni.