India ramah Covid-19 kai 53,256 hmuh belh leh

India ramah Pathianni khan Covid-19 hri kai 53,256 hmuhchhuah belh leh an ni a, ni 88 chhunga hri kai thar tlem ber ṭum a ni. Hri kai mek, active case pawh tlahniam ve zelin, mi nuai 7.02 an awm a, positive dama chhuahtir vaibelchhe 2.88 an awm tawh bawk.

Pathianni vek khan hri vangin mi 1,422 an thi a, April 16 hnua ni khatah hri vanga thi an tlem ber ṭum a ni. Hripui vanga thi hi mi nuai 3.88 an tling tawh.

Kerala-ah Pathianni khan hri kai thar 11,654 an awm a, Karnataka lehpelin ramchhunga hri kai tam ber dawttu state an ni.

Hri leng thawh hnihna chuan ziaawm lam a pan zel a, district 650 zinga 90% dawnah hri kai thar hi an tlahniam tawh. West Bengal chiah hi kar hmasa chhunga state lian zinga hri kai pun tamna awmchhun a ni. State dang pahnih Manipur leh Mizoram-ah pawh hri kai mek in sanlam a pan chho a, mahse state pahnihah hian ni khata hri kai thar hi 1,000 hnuailam daih a la ni thung.

Hotel, tourism, transport leh thlawhtheihna hmanga bungraw thawn leh khawl hmanga sumdawng tenaute chuan hri leng thawh hnihna nghawng an tuar ṭan a - an sum lakluh tlahniam leh loan rulh let ngai ṭhahnem tak te chu an harsatna thlentu lian ber a nih thu an sawi.

Reserve Bank of India data tarlan danin, ramchhunga state 25 aṭangin district 159 ah chuan January - March inkar khan fixed deposit-a pawisa dah a tlahniam a ni.