July-August-ah vaccine pek chhuah chak zawkin kalpui dawn : Amit Shah

Union home minister Amit Shah chuan sorkar laipui chuan July-August-ah Covid vaccine pek chhuah chak zawka kalpuina turin ruahmanna a siam vek tawh a ni, a ti.

Nimina media mite a kawmnaah, Union Home Minister chuan vaccine dose kima lak chu thil pawimawh tak a ni tiin, ram mipuite chu coronavirus hri laka an invenna turin vaccine la vek turin a ngen. Amit Shah hian nimin khan Ahmedabad-a Pandit Deendayal Upadhyay Centre-a Covid care centre siam chu a tlawh a ni.

Minister chuan prime minister Narendra Modi chuan nimin, June 21 aṭang khan ram chhung mipui, kum 18 chunglamte chu sorkar laipuiin a thlawnin Covid vaccine a pe dawn tih a lo puang tawh a, hei vang hian vaccine pek chhuah hna pawh hi chak zawkin kalpui chhoh a ni dawn a ni, a ti.

"India ram, mihring tamna rama kum 18 chin a thlawn veka vaccine pek tum chu thutlukna lian tak a ni a, he hmalakna hi International Yoga Day-ah kalpui ṭan a ni. Hei hian ram mipuite a puih bakah, Covid-19 hri leng dona kawngah hlawhtlinna a thlen ngei ka beisei a ni," tiin Shah chuan a sawi.

Vaccine dose vbc 29 chuang state/UT hnenah pe tawh
Sorkar laipui chuan free of cost category hnuaiah state/UT hnenah Covid-19 vaccine dose vaibelchhe 29 chuang a pe tawh tih nimin khan union health ministry chuan a sawi.

State/Ut-te hnenah vaccine dose 29,35,04,820 pek chhuah tawh aṭangin hman tawh hi dose 26,36,26,884 a ni a, hei hian tihriral ho pawh a huam tel. Tunah hian state/UT-ten vaccine an kawl mek hi dose vaibelchhe 2.98 chuang a la ni, a ti.

Sorkar laipui hian vaccine policy a siam ṭhatah, ram puma kum 18 chunglamte hnena a thlawna sem turin, a siamtute hnen aṭangin vaccine an siamchhuah aṭanga 75% leiin hei hi state/UT-te hnenah a sem dawn a, private sector hospital-ten a bak 25% hi an an lei thei a ni. A hma khan sorkar laipui hian vaccine hi a siamtute hnen aṭangin 50% leiin, a bak 50% chu state sorkar leh private hospital-ten an lei ve thung a ni.