Andra Pradesh-in vaccine pekah record siam

Andra Pradesh state chuan Pathianni khan Covid-19 vaccine dose nuai 13 chuang pe chhuakin, ni khata vaccine pe chhuak tam record a siam.

Pathiannia special drive neih hi zan dar 9 thleng kalpui niin, vaccine dose 13,45,004 an pe chhuak hman a ni.

State mipui vaibelchhe khat chuangin vaccine dose khatna an la tawh bawk.

"Pathianni zan dar 8 thleng khan state pumah mi maktaduia 1.3 chuang hnenah vaccine kan pe tawh a ni. Sorkar laipuiin vaccine a pechhuak ṭha thei a nih chuan medical team leh staff te'n nikhata vaccine maktaduai khat chuang semchhuah an harsat dawn lo , hnathawktute inpekna hi a chhuanawm hle" tiin state sorkar thuchhuak chuan a sawi.

Special vaccination drive hi chief minister YS Jagan Mohan Reddy thupek angin state health department-in an kalpui a ni. State sorkar hian a hmain nikhatah vaccine dose nuai ruk chuang pe chhuakin record a lo siam tawh bawk.

Official-te chuan he thil hlawhtlin theih chhan chu volunteer leh healthcare provider-te inpekna a ni tiin, hri leng dan chah theihna awm chhun chu vaccine pek chhuah a ni tih an hriatchian vang a nih thu an sawi.

Vaccination drive-ah hian kum 45 chunglam leh hmeichhia, fa kum nga hnuailam neite thlur bing niin, district 13-a hmun 2,000 chuangah pek chhuah a ni.