Vaccination policy thar hnuaiah Ni khat chhungin dose nuai 86.16 pe chhuak

CoWin website data tarlan danin Thawhṭanni khan ram pumah Covid-19 vaccine dose nuai 86.16 pek chhuah a ni a, sorkar laipuiin vaccination policy thar a kalpui ṭan niah ni khatah vaccine pek chhuah tam ber record hi a siam a ni.

Prime Minister Narendra Modi chuan record siam chu lawmawm a tih thu a sawi a, "Covid-19 do nana kan ralthuam ṭha ber chu vaccine hi a ni. Vaccine late ka lawmpui a, mitinin vaccine kan dawn theihna tura rim taka thawktu frontline warriors ka chhuang hle. I ti ṭha e India!" tiin a Twitter kaltlangin a sawi.

Sorkar laipui hian Thawhṭanni aṭang khan kum 18 chin tan a thlawnin vaccine a semchhuak ṭan a, vaccine semchhuah chungchanga policy a lo siam tawh chu a sut leh a ni.

PM Modi lo sawi lawk tawh angin, sorkar laipui hian vaccine siamchhuaktu company hnen aṭangin an siamchhuah aṭanga 75% an lei sak dawn a, private hospital-te chuan a bang 25% te chu an lei thei dawn thung.

Thawhṭannia vaccine pek chhuah tam record siam hmaa record lo awm chu April 2-a dose 42,65,157 pek chhuah kha a ni.

"Sorkar laipui chuan 'Free Vaccination For All campaign' an kalpui ṭan a. He hmalakna chhawr ber turte chu mi rethei, middle class leh ṭhalaite an ni. Mitinin vaccine hi la vek ang u. Kan ṭanrual chuan Covid-19 hri hi kan hneh thei a ni," tiin PM chuan a sawi.

Lockdown thlahdul chhoh a nih ṭan avangin state tam tak chuan vaccine tam zawk pek chhuah tumin hma an la. Gurugram health department tarlan danin, Thawhṭanni zan dar 7:30 thleng khan khawpui chhungah vaccine hi dose nuai khat chuang an pe chhuak hman tih sawiin, ni khatah an pek chhuah tam ber ṭum a ni.

Ramchhunga vaccine pek chhuah tlemna zinga mi Assam-ah chuan state sorkarin Thawh­ṭanni khan "Enhanced Covid Vaccination" drive a kalpui a, ni 10 chhung nitin mi nuai thum hnenah vaccine pek hman a tum. Thawhṭanni khan mi nuai 3.19 hnenah vaccine hi pek an ni.

Karnataka chuan Thawhṭanni khan mi nuai sarih vel hnenah vaccine a pe a, ni khatah mi nuai 10 chuang pek theih ziah a tum.Madhya Pradesh-ah Thawhṭanni khan dose 16,01,548 pek chhuah a ni. Uttar Pradesh-ah dose 6,74,546 , Rajasthan-ah dose 4,30,439 leh Maharashtra-ah dose 3,78,945 pek niin, West Bengal chuan dose 3,17,991, Punjab-ah dose 90,503 leh Delhi-ah dose 76,216 ni khat chhungin pekchhuah a ni bawk.

Sorkar laipui hian Pathianni khan state-te kutah vaccine dose vaibelchhe 3.06 a awm mek tih sawiin, ni thum chhungin dose 24,53,080 sem chhuah leh an tum tih a sawi. Sorkar laipuiin vaccine policy a siam hmasakah khan kum 45 chunglamte tana thlawna vaccine pek turte chauh hi state sorkar kutah hlanin, kum 18-44 inkar tana pek tur chu state sorkarten an lei ve thung a ni. Mahse policy hi siamṭhain, sorkar laipui chuan kum 18 chunglamte hnena a thlawna pek turin vaccine hi state/UT-te hnenah a sem leh vek dawn a ni.

Hri kai thar tlahniam zel
India ramah Covid-19 hri kai hmuh chhuah thar an tlahniam zel a, Thawhṭanni khan hri kai thar mi 42,640 awmin ni 90 chuang hnua ni khatah hri kai thar 50,000 hnuai lam an awm ṭum khana a ni.

Hri kai mek, active case pawh nuai 6.62-ah an thla thla tawh.

Union health ministry chuan ram pumah ni khata hri kai hmuh chhuah, daily positivity rate chu 2.56% ni tawhin; kar khata hmuh chhuah, weekly positivity rate pawh 3.21% a ni tawh tih a sawi.

Thawhṭanni khan hripui vanga thi mi 1,167 awmin, hemi ni vek hian hri kai enkawl dam 81,839 an awm bawk.