India ramah hri kai vaibelchhe 3 tling tawh : Ni 50 chhungin vaibelchhe 1 hmuhchhuah a ni

India chu United States dawta Covid-19 kai vaibelchhe thum chuang awmna ram a ni ve leh ta.

India hian mellung duhawm loh tak hi Thawhlehni khan a siam a, hri kai hmuhchhuah vaibelchhe hnih an tlin aṭanga ni 50 hnuah vaibelchhe thumah an tling chho a, ram pakhat aṭanga hri kai vaibelchhe khat tling rang ber a ni.

US hian Covid-19 hri kai vaibelchhe khat tling turin ni 54 an hmang a, nikum November 5 khan vaibelchhe khat awmin, December 29-ah vaibelchhe hnihah an kai chho.

India rama hri leng thawh hnihna nasat lai, May 3 khan hri kai vaibelchhe hnih an tling, ni 36 (May 17 - June 22) chhungin hri kai nuai 50 hmuhchhuah belh lehin , hri leng thawh hnihna hian zia awm lam a pan chho ṭan a ni. Hri kai thar nuai 50 hi ni 15 liamta chhunga hmuhchhuah a ni a, a hma hian ni 14 chhungin nuai 50 hmuhchhuah an ni.

Hri kai hmuh chhuah tawh zawng zawng aṭanga 68% chu hri leng thawh hnihna (March 1 aṭang chhiar ṭanin) thlen hnu, thla t hum leh a chanve chhunga hmuh chhuah a ni. Hri vanga thi, mi 3,90,600 aṭangin 2,33,402 chu hri leng thawh hnihnna thlen hnua thi niin, thi zat aṭanga 60% an tling pha.

India ramah hri kai 30,027,364 hmuhchhuah an awm tawh a, khawvela hri kai hmuh chhuah tamna ber US-ah chuan vaibelchhe 3.44 an awm tling tawh a ni. Brazil ramah hri kai hi vaibelchhe khat an chuang tawh bawk.

Thawhlehni khan India-ah hri kai thar 50,497 an awm belh leh a, mi 1,047 in an thihpui bawk. Thawhṭanni khan hri kai thar 50,000 (42,667) hnuai lamah tla thla in, thihpui 1,000 (908) hnuailamah a tla thla bawk a, mahse Thawhlehniah hri kai thar leh thihpui hi an rawn pung leh hret a ni.