ICMR leh NIV te'n Delta plus variant-in Mihringa hna a thawh dan zirchiang dawn

Indian Council of Medical Research (ICMR) leh National Institute of Virology (NIV) te chuan Covid hri inthlak danglam hmuh chhuah thar, 'Delta Plus'-in mihringa hna a thawhdan an zirchiang dawn.

Maharashtra (Ratnagiri leh Jalgaon), Kerala (Palakkad leh Pathanamthitta) leh Madhya Pradesh (Bhopal leh Shivpuri)-ahte Delta Plus variant kai hmuhchhuah an nih avangin sorkar laipui chuan he ruahmanna hi a siam.

"Delta Plus hi a hmaa hri chi hrang hmuhchhuah aiin inkaichhawn a awlsam zawk a, chuap a khawihchhe chak zawk a, monoclonal antibody treatment dodalna a siam thei a ni. Kan dinhmun thlirin Delta Plus variant hi ngaihven ngai tak a ni a, he hri darhna hmunah khuah khirhna dan kenkawh vat zel a ngai," tiin NIV Maximum Containment Facility hotu Dr Pragya Yadav chuan a sawi.

Dr Yadav chuan data tihchhuahah, India rama Covid vaccine hmante hian Delta variant lakah a veng tha tawk a, hetiang bawk hian Delta plus lakah pawh a hnathawh dan a ngai reng a rinawm thu sawiin, he hri hi an zirchiang mek tih a sawi a ni.

Covid-19 Delta plus variant inkaichhawn awl tak hi mi 21-ah hmuhchhuah a ni tawh. Maharashtra-ah he hri inthlak hi hmuhchhuah leh a nih avangin mithiamte chuan state chhungah hri leng thawh thumna a thlen leh an hlauthawng hle a ni. Kerala, Karnataka leh Madhya Pradesh-ahte pawh a kai hmuhchhuah an ni tawh. Khawvel pumah Delta Plus variant kai 200 vel chauh hmuhchhuah la ni mah se chung zinga mi 30 chu India rama mi an ni. Hri inthlak thar hmuh hian hun lo kal turah chhiatna nasa zawk a thlen hlauhthawnna a lian tawh hle a ni.

Union Health Secretary Rajesh Bhushan chuan Delta plus variant te hi hri in kai awlsam tak "variant of interest" a ni tih an finfiah tawh a, mahse vaccine hna thawk ṭha theilo khawpa thlentu "variant of concern" erawh a la ni lo tih a sawi.

Sorkar laipui chuan state-te hnenah Delta plus variant hmuhnaah khuahkhirhna dan khauh tak siam tur te, test tam zawk kalpui tur te, hri kai chhui leh vaccine semchhuah hna chak zawka kalpui turin a ti.

Hri kai thar 54,069 awm belh
India ramah Nilaini khan coronavirus kai thar 54,069 an awm a, thihpui 1,321 an awm leh bawk.

Health Ministry tarlan danin ramchhungah hri kai 3,00,82,778 hmuhchhuah an awm tawh a, an zinga nuai 3.91 chuan an thihpui tawh a ni.

India rama positivity rate pawhin tlakhniam lam pan zelin, ni 17 chhung 5% hnuai lamah tla thla tawhin, 2.91% a ni mek.

Hri kai mek 6,27,057 an awm a, hri kai thar aiin dama chhuahtir ni 42 chhung a zawnin an tam tawh a ni.

India rama cheng zinga 2.2% chuan hri an kai tawh tih sorkar data chuan a tarlang. "Containment strategy khauh tak leh Covid appropriate behaviour kan zawmṭhat chuan hri leng thawh thumna hian kan health system buaina khawp thlen loin kan awm thei dawn a ni," tiin health ministry joint secretary Lav Agarwal chuan a sawi.