SC-in state board-te hnenah July 31-ah Internal assessment result puang turin hriattir

Supreme Court chuan nimin khan state board hrang hrang hnenah, Class 12 examination-a internal assessment result chu July 31-ah puang vek turin a ti. Board tinte chu mark pek dan chungchangah thuneihna leh zalenna pek vek an ni bawk.

Court chuan assessment mark pek chungchang scheme in ang vek hmang turin a ti dawn lo tih sawiin, hemi rual hian state board tinte chu an scheme hman tur a rang thei anga siam tur leh, nimin aṭanga chhiara ni 10 hma ngeia tifel hman turin a ti a ni.

Hripui leng vanga board examination buatsaih lo tura state hrang hrangte hriattir tura ngenna thehluh chu nimin khan court hian a ngaihtuah a ni. Justice AM Khanwilkar leh Dinesh Maheshwari awmna bench chuan video-conferencing kaltlangin hearing a nei a ni.

Petition thehluttu lam hian hripui leng vanga state board exam neih turte ṭhulh tur leh, zirlaite mark pek dan turah scheme ang khat hmang tura an duh thu an sawi. Mahse court chuan hei hi hnawlin, an vaia scheme in ang hmantir a theih loh thu leh, board tinte thuneihna a nih thu a sawi thung.

June 17 khan Supreme Court hnenah hian state 28 zinga state paruk chuan Class 10 leh 12 board examination an buatsaih fel tawh a, state 18 in an ṭhulh tawh tih hriattir a ni. Hetih lai hian state pali chuan an ṭhulh lo a, mahse an zinga pahnih, Assam leh Tripura chuan a hnuah board exam ni ṭhulh a nih thu an puang zui ve leh.