July 7 aṭangin Congress-in lungawi lohna lantir dawn

Congress party chuan ramchhunga thil man sang chak lutuk leh hna hmu lo tam tak an awm avangin July 7 aṭangin ram pum huapin ni 10 chhung lungawi lohna an lantir dawn.

Lungawi lohna lantir chhung hian party hruaitu leh worker-te chu district tinah thirsakawr hmanga kawngzawh, Cycle yatra an nei dawn a ni. State level-ah erawh chuan kawngzawh leh inkhawmte buatsaih an tum tih Congress thuchhuak chuan a sawi.

"Covid-19 vanga mipuiten manganna nasa tak an tawh mek a, hna nei lo an pung chhoin hlawh tihhniam sak tam tak an awm tawh bawk. Congress party chuan ram pum huapa block, district leh state level-ah te nawrh huaihawt hi kan rel ta a ni. State unit tinah July 7 - July 17 chhungin lungawi lohna hi lantir a ni dawn a, heng hun hi party Leader, AICC hnuaia pawl hrang hrang hruaitu leh party worker-te chuan an hmang dawn a ni," a ti.

Ramchhunga tuialhthei man a san belh zel a, state tam takah chuan litre khat Rs 100 chuang te a kai tawh a ni. Congress party chuan tuialhthei man tihhniam phutin petrol pump tinah signature campaign an buatsaih dawn a, June 11 khan ram pumah petrol leh diesel man sang chak lutuk vangin lungawi lohna an lo lantir tawh bawk a ni.

Ningania Congress president Sonia Gandhi, general secretary leh state in-charge te inhmu­khawm chuan rampuma lung­awi lohna lantir hi an rel a ni. Petrol leh essential commodities man sang zel chunchang sawiin, Sonia Gandhi chuan, "Khawsak harsat lai leh nunna tamtak kan hloh lai takin thil man nasa takin a pung a, hna hmu lo pung chak tak avangin ram dinhmun siamṭhat chu thil harsa tak tur a ni" a ti.

Sonia Gandhi chuan mi ṭhenkhat, Covid vaccine lak hreh awm ṭhinte chu ngaihven a, buaipui turin party hruaitute a ngen a, hri leng thawh thumna pawh thleng thei a nihthu leh, hemi atana theihtawpa lo inven lawk a ṭul thute a sawi.