Covishield leh Covaxin-in Alpha, Beta, Gamma leh Delta variant lakah veng thei

Covid-19 hri, Delta Plus variant darh chak tak karah sorkar laipui chuan India rama siamchhuah Covid vaccine - Covishield leh Covaxin-te chuan SARS-CoV-2 variant Alpha, Beta, Gamma leh Delta lakah ṭha takin min veng thei tih a sawi a, hetihlai hian Delta Plus variant laka vaccine hnathawh dante zirchian mek a nih thu an sawi.

"Hri inthlak danglam zel vanga vaccine-in an chakna te an hloh tiha sawi ṭhinte chu zirchianna hmangin a dik lo tih kan hre tawh a, Alpha variant lakah Covaxin chakna hi a ngai reng a, Covishield hi Alpha variant lakah 2.5 velin a chakna a tlahniam. Covaxin hian Delta variant lakah hna a thawk ṭha a, antibody response erawh a thuah thumin a tlahniam a, Covishield lakah thuah hnih velin an tlahniam thung a, Pfizer leh Moderna-ah chuan a thuah sarih in an tlahniam," tiin ICMR Director General Balram Bhargava chuan a sawi.

ICMR Director General chuan India rama vaccine siamchhuah pahnihte hi Delta lakah hna a thawk ṭha tawk niin a sawi a, "Hei hian kan vaccine rintlak zia a nemnghet a ni," a ti.

Sorkar laipui chuan Delta Plus variant kai hmuhchhuah thar 51 an awm tih sawiin, variant of concern ah puangin, state 12-ah he hri kai hi hmuhchhuah an ni tawh. Delta Plus variant hi inkaichhawn a awlsamin, mihring chuap chu hna thawkṭha thei lo in a siam mai bakah monoclonal antibody response a tihniam thei bawk a ni.

"Delta plus variant hi ICMR-NIV-te'n an zirchiang mek a, vaccine hian engchin in nge hna a thawh tih endik mek a ni. Tun aṭanga ni 10 hnu velah result kan hre thei ang," tiin Bhargava chuan a sawi.

Union health secretary Rajesh Bhushan chuan Delta Plus variant kai awmna state hnenah lehkha thawnin, hri awmdan azira inkhuahkhirhna dan uluk taka siam turin a hrilh. District leh cluster tinah mipui punkhawm khapna te, test tam zawk neih te, contact tracing rang zawk leh vaccine darhzau zawka sem a nih theihnan dan siam turin a chah.

India ramah hri kai thar 50,040 an awm
India ramah Inrinni liam ta khan hri kai thar 50,040 awm belh lehin, Zirtawpni aiin hri kai 1,258 in an tam. Ramchhungah hri kai vaibelchhe 3.02 awm tawhin, thihpui nuai 3.95 an awm tawh tih Health Ministry chuan a tarlang.

Kerela chu hri kai hmuh­chhuah tam berna ni lehin, hri kai thar 12,118 an awm a, Maharashtra (9,812) leh Tamil Nadu (5,415) te'n an dawt.

India test positivity rate chuan tlakhniam lam a pan zel. Ni 20 chhung chu a zawnin 5% hnuailamah a tlathla tawh a, nimin thleng khan 2.82% a ni mek a ni.

Hri kai mek pawh nuai 5.86 ah an tlahniam tawh a, hri kai thar aiin dama chhuahtir chu a zawnin ni 45 chhung an tam tawh zawk a ni.

January thlaa vaccine drive kalpui a nih aṭang khan ramchhunga mi vaibelchhe 32.17 in vaccine an la tawh bawk.