PM Modi-a'n Mann Ki Baat vawi 78-na hmang

Prime minister Narendra Modi chuan nimin khan thla tina radio programme a hman ṭhin, Mann Ki Baat vawi 78-na a hmang.

PM Modi chuan Covid-19 vaccine la vek tura mipuite chahin, vaccine lak hlauhthawnna an neihte tibo turin a chah. Amah ngei pawhin vaccine dose kima a lak tawh thu leh, a nu kum 100 dawn mi pawhin a lak thu sawiin, vaccine-te chu an him tawk a ni, a ti. Vaccine lak chauh chu hri laka invenhim theihna a nih thu a sawi bawk.

Modi chuan June 21-a sorkar laipui vaccine policy thar hnuaia ni khatah vaccine dose nuai 86 pek chhuah a nih chungchang pawh sawichhuakin, hemi kawnga hmalatute fakawm a tih thu a sawi.

Corono hri leng dona kawnga doctor-te hnathawh leh inpekna fakin, Modi chuan mi tam tak nunna an chhanhim a ni, a ti. July 1-a Nation Doctor's Day hman tur pawh kum dang zawng aiin a special bik tih a sawi bawk. Hemi rual hian ram dinhmun siamna kawnga Chartered Accountant-te hnathawh pawh fakin, Chartered Accountants Day pawh July 1 vek hian hman a ni ṭhin a, duhsakna a hlan nghal tih a sawi bawk.

Prime Minister chuan Indian sprint legend Milkha Singh a uina thu pawh sawiin, Indian sports tana a inpekna chu fakin hriatreng a nih dawn thu a sawi. Tokyo-a Olympics neih tura Indian infiammi tel turte inpekna leh thawhrim thute PM chuan a sawi a, mipuite chu infiammite hi pawngpaw nawr lo a, theihtawpa lo thlawp zawk turin a chah bawk a ni.