Kum 12-18 inkar tan Zydus Cadila COVID-19 vaccine peih thuai dawn

Sorkar laipui chuan Indian pharmaceutical company Zydus Cadila siam, Covid-19 vaccine thar chu kum 12-18 inkar hman turin peih a ni thuai dawn tih a sawi.

Supreme Court hnenah sorkar laipui chuan he thu hi hrilhin, Zydus Cadila chuan DNA vaccine a siam chu clinical trial pawh a zo fel tawh a, vaccine hi hman theih a ni thuai dawn tih Inrinnia affidavit a thehluhah a tarlang.

Kumin December 31-ah ram puma puitlingte chu Covid vaccine pek hman vek a tum tih sorkar laipui chuan a sawi. Kum 18 chunglam mi vaibelchhe 93-94 te hnena vaccine pek tur hian dose vaibelchhe 186-188 mamawh a ni dawn a, heng zinga dose vaibelchhe 51.6 chu July 31-ah chuan a nei hman dawn tih a sawi.

Union ministry of health and family welfare chuan sorkar laipuiin Covid-19 vaccine dose vaibelchhe 135 lei tumin hma a lak mek thu a sawi bawk a, hengte hi Covidshield dose vaibelchhe 50, Covaxin dose vaibelchhe 40, BioE siam dose vaibelchhe 30, Sputnik V vaccine dose vaibelchhe 10 leh Zydus Cadila DNA vaccine dose vaibelchhe 5 a nih thu sawiin, August-December inkarah heng vaccine-te hi a lei hman dawn a ni, a ti.