India-ah Covid-19 hri kai thar 46,148 awm belh : Ni 76 chhunga hri vanga thi tlem ber ni thleng

India ramah Pathianni khan Covid-19 hri kai thar 46,148 awm belh lehin, hri kai hmuhchhuah hi 3,02,79,331 an awm tawh.

Pathianni vek khan hri vanga thi chu 1,000 hnuai lamah tla thlain mi 979 an thi a, ni 76 hnua ni khatah hripui vanga thi an tlem ber ṭum a ni. Nimin zing thleng khan ram pumah hri kaihnawiha thi 3,96,730 an awm tawh tih Health Ministry data chuan a tarlang.

Nimin zing dar 7-a ministry data tarlan danin, ramchhunga vaccination drive kalpuina hnuaiah vaccine dose vaibelchhe 32.36 semchhuah a ni tawh.

"India chuan mellung pawimawh tak kan siam leh a, USA lehpelin Covid-19 vaccine dose semchhuak tam ber kan ni," tiin Ministry chuan a sawi.

Hri kai mek, active case pawh 5,72,994 ah a tlahniam a, hri kai mek hi hri kai hmuhchhuah tawh aṭanga chhutin 1.89% chiah a ni. Covid-19 hri kai dam tawh, recovery rate pawh 96.80% ah a sang chho tawh bawk a ni.

Pathianni khan sample 15,70,515 test a ni a, ramchhunga Covid-19 test nei tawh hi 40,63,71,279 a tling tawh.

Ramchhungah nitin vaccine dose nuai 60 chuang pe chhuak ziah anga chhut a ni. Mahse mipa leh hmeichhe inkarah vaccine la tawh inthlauhna a tam hle thung. Mipa zingah 54% in vaccine la tawhin, hmeichhia 46% in vaccine an la tawh thung a, mipa leh hmeichhe vaccine la tawh inthlauhna hi 8% a ni. India rama mipui cheng zat aṭanga chhutin hmeichhia aia mipa tamna hi 5% chauh a ni thung a ni.