EU Green Pass-a Covishield telh loh chungchangah Serum Institute hotuin theihtawpa hma lak a tiam

European Union (EU)-in Green Pass programme hnuaia Covid-19 vaccine a pawm zingah, India rama siam Covishield a telh loh chungchangah he vaccine siamtu, Serum Institute of India (SII) CEO Adar Poonawalla chuan thuneitu lamte dawra theihtawp chhuah a tum tih a sawi.

Adar Poonawalla chuan, "India mi tam tak, Covishield vaccine laten EU-a zinna turah harsatna an tawk tih ka lo hria a. Hemi chungchang hi thuneitute hnenah thlenin hma kan la mek a, kan chinfel theih thuai kan beisei a ni," a ti.

European Medicines Agency (EMA) chuan Green Pass programme hnuaiah hian Covid-19 vaccine pali - Comirnaty (Pfizer/BioNTech), Mo­der­na, Vaxzervria (AstraZeneca-Oxford), Janssen (Johnson & Johnson)-te chauh a la pawm a ni. Covishield hi World Health Organisation (WHO) in pawm tawh mah se Green Pass pek zingah an la telh ve lo.

Covishield hi AstraZeneca leh SII-in India rama an siam a ni a, hetihlai hian AstraZeneca-in UK leh Eupore-a a siam, Vaxzervria erawh chu Green Pass-ah hian telh a ni thung.