Agni Prime hlawhtling takin enchhin

India chuan nimin zing khan Agni Prime ballistic missile chu Odisha tuipui kam aṭangin hlawhtling takin a enchhin.

Defence Research and Development Organisation (DRDO) chuan chawhma dar 10:55-ah Bhubaneswar chhak lam, km 150 vela hla, Dr AJP Abdul Kalam island-a testing facility aṭangin ruahman lawk angin hlawhtling takin test neih a ni tih a sawi.

Agni Prime missile hi Agni class missile variant thar leh tha ber a ni a, nuclear ralthuam phur thei niin, km 1,000-2,000 chin a kap thei a ni.

Ram chhunga Covid-19 hri leng thawh hnihna thlen hnua DRDO-in missile a test hmasak ber a ni. Nikum September leh October thla inkar, kar ruk chhung khan missile 12 zet a lo enchhin tawh bawk.

Agni series missile test fire hmasa ber chu kum 1989, May thla khan neih a ni a, hemi ṭuma an enchhin hi km 700-900 inkar kap phak a ni. Kum 2004 khan Armed Forces hnenah hlan a ni.

DRDO hian Inrinni liam ta khan Chandipur, Odisha-a Integrated Test Range aṭangin ram chhunga siam, 'Pinaka' rocket extended range version chu hlawhtling takin an lo kap chhuak tawh bawk. 'Enhanced pinaka' rocket 25 chu Multi-Barrel Rocket Launcher (MBRL) aṭanga kap chhuakin, range hrang hranga an target-te an fuh tih a sawi.