Foodgrain scheme tan Rs vbc 93,869 seng dawn : Nirmala Sitharaman
Sorkar laipui chuan Covid-19 hri leng thawh hnihna tuartu, mi rethei zawkte chhawmdawlna tura chaw lam chi, foodgrain a thlawna a sem ṭhinah May-November inkar chhungin cheng vaibelchhe 93,869 a seng dawn tih union finance minister Nirmala Sitharaman chuan a sawi.
Hripui leng vangin sorkar laipui chuan May-November inkar hian thla tin mi vaibelchhe 80 chuang hnenah foodgrain kg 5 zel a thlawnin a sem dawn a ni.
Sorkar laipui hian hripui len laia mipui phurrit chhawk zangkhai nan nikum khan Pradhan Mantri Garib Kalyan Anna Yojana (PMGKAY) a siam a, hei hi National Food Security Act (NFSA) hnuaia mi vaibelchhe 80 hnenah a thlawnin foodgrain semna tura duan a ni.
He scheme hi April-November, 2020 chhung khan hman a ni. Kumin April thlaa hri leng thawh hnihna a rawn thlen leh avang khan he scheme hi May-June atan kalpui leh niin, a hnuah November thla thleng atan pawhsei zui a ni.
Finance minister Sitharaman chuan kumin November thla thlenga ei tur a thlawna semna tur atan hian sorkar laipui chuan Rs vbc 93,869 a seng dawn a, nikum khan he scheme atan hian Rs vbc 1,33,972 sen a lo ni tawh bawk tih a sawi.
PMGKAY atana sum hman tur ruahman hi Rs vbc 2,27,841 a ni tih Finance Minister chuan a sawi bawk.
He scheme hi nikuma hri leng a ziaawm hnu, December aṭang khan tihtawp a ni a, mahse kuminah hri a len thar leh avanga mipui khawsak harsa zawkte phurrit chhawk zangkhaina turin hman a ni leh ta a ni.
Prime minister Narendra Modi chuan tun thla tira ram mipuite hnena thuchah a sawiah khan, sorkar laipuiin a thlawna ei tur semna programme a siam, PMGKAY chu Diwali thlenga hman tura pawhsei a nih thu hi a sawi.
NFSA-in a huam mi vaibelchhe 81.35 hnenah PMGKAY hmang hian foodgrain kg 5 chu thla tin a thlawnin pek a ni. Hei bakah hian a hmaa lo kalpui tawh angin chhawmdawlna dawng thei chinte hian thla tin ration dawra man tlawm taka foodgrain kg 5 chin an lak ṭhin pawh an la chhunzawm zel thei dawn a ni. Subsidised rate-in buhfai hi kg 1 Rs 1-3 inkarin an la ṭhin a ni.