Ni 102 hnuah hri kai thar 40,000 aiin tlem ta : Ram pumah hri kai mek nuai 5.52 an awm

India ramah Thawhṭanni khan ni 102 hnua a ṭum khatna atana ni khat chhunga Covid-19 kai thar 40,000 aiin an tlem ṭum a thleng tih ministry of health and family welfare chuan a sawi.

Thawhṭannia ram puma hri kai hmuhchhuah thar chu mi 37,566 an ni a, hri kai mek, active case pawh tlahniam zelin nuai 5.52 ah a tla thla tawh bawk.

Kartin test aṭanga hri kai hmuhchhuah, weekly positive rate chu 2.74% a ni mek a, nitin test aṭanga hri kai zat pawh 2.12% ah a tlahniam tawh bawk.

Coronavirus kaihhnawih vanga thi chu Thawhṭanni khan mi 907 awm belh lehin, hemi ni vek hian dama chhuahtir hi 56,994 an awm. Ramchhunga Covid-19 vanga thi hi 3,97,637 an tling tawh a, dama puan vaibelchhe 2.93 an awm tawh thung.

Ramchhungah vaccine la vaibelchhe 32.90 an awm tawh bawk.

Covid Task Force chief VK Paul chuan India ramah hripui leng thawh thumna a rawn thleng leh mai dawn nia sawi chungchangah, hri awmdan hi sawi lawk theih a nih loh avangin a rawn thlen hun tur lo sawi lawk hi a dik ber lo niin a sawi. Hemi rual hian hri leng dona kawnga sorkar kaihhruaina siamte zawm ṭha a, mipuite an thawhho ṭhat chuan hri leng thawh dang thleng tur pawh pumpelh theih a ni ve bawk tih a sawi.