'One Nation, One Ration Card' scheme July 31 hmaa hmang turin SC-in hriattir

Supreme Court chuan nimin khan state leh Union Territory tinte hnenah 'One Nation, One Ration Card' scheme chu July 31 hmaa hmang vek turin a hriattir.

Court chuan 'One Nation, One Ration Card' scheme chu state tinten migrant worker-te tan an hman a ngai tih a sawi. Covid hri leng reh hma chuan dry ration leh ei tur dang sem hna chu chhunzawm zel a ni tur a ni, a ti. State tinte chu state dang mi inhlawhfaa awm, ration card nei ve lote hnena ei tur semna dan tur scheme duang vek turin a ti bawk.

Supreme Court chuan sorkar laipui hnenah unrecognised worker-te registration tihna tur portal chu July 31 hmaa siam turin a hrilh bawk a ni. Tun thlenga heng mite in register-na tur software tihfel a la nih loh chungchang pawh sorkar laipui chu zawtin, ration card neilo migrant worker-te hnena kumin November thla thlenga Pradhan Mantri Garib Kalyan Yojna hnuaia ei tur a thlawna pek an nih dan tur pawh a zawt nghal bawk a ni.

Sorkar laipui chuan ONORC scheme hi state tam zawkin an kalpui mek tih a sawi a, hetihlai hian state pali - Assam, Chhattisgarh, Delhi leh West Bengal chuan an la hmang ve lo niin a sawi.