SC-in Covid-19 vanga thi chhungte zángnadawmna pe turin ti

Supreme Court chuan Nilaini khan sorkar laipui hnenah Covid-19 vanga thi chhungte hnenah zángnadawmna pek dan tur atana kaihhruaina chu kar ruk chhunga siamfel hman turin a ti.

Tunhnai lawk khan sorkar laipui chuam Supreme Court hnenah hian hripui thihpui chhungte zawng zawng hnenah chuan zángnadawmna Rs nuai 4 em em chu an pe thei lo tih a lo thlen tawh a, nimin khan Court lam chuan thupek thar tichhuakin zángnadawmna erawh pe ngei turin a ti a ni.

SC chuan sorkar laipui thu thlen hriatthiampui chungin National Disaster Management Authority (NDMA) chu zángnadawmna pek zat tur bithliah turin a ti a, hemi rual hian sorkar hnenah Covid-19 vanga thite chu hripui an thihpui ngei a ni tih finfiahna 'death certificate' pe chhuak tura hriattirin Covid-19 kaite enkawlna tur 'insurance policy' siam turin a ti bawk.

Supreme Court bench chuan NDMA chu zángnadawmna pek zat tur bithliahtu tur an nih thu sawiin, an tih tur ang an tihlawhtling lo niin a sawi theih, a ti. "Zángnadawmna pek hian sum leh paiah erawh nghawng a nei ngei ngei dawn. Tu ram mahin sum leh pai zo thei lo an nei lo. Court-in Rs nuai 4 pe ngei tura a tih erawh thil fel ber niin a lang lo. Sorkarin a zat erawh a bituk tur a ni," tiin SC chuan a sawi.