Covid-19 kai 45,951 hmuhchhuah belh

India ramah Thawhlehni khan Covid-19 kai thar 45,951 hmuhchhuah belh leh a ni a, Thawhṭanni aiin hri kai thar hi an tam zawk tih Health Ministry chuan a tarlang. Hri kaihhnawiha thi 817 awm lehin, ram pumah Covid-19 vanga thi hi nuai 4 an tling teuh tawh hle.

Hri kai mek pawh 5,37,064-ah an tlahniam a, hri kai hmuhchhuah tawh aṭanga chhutin 1.77% chiah an ni tawh a ni.

Hri kai thar aiin dama chhuahtir hi a zawnin ni 48 chhung an tam tawh zawk bawk. Thawhlehnia hri kai enkawl dam 60,729 awmin, hri kai tawh zinga 96.92% chu enkawl dam an ni tawh.

Thawhlehnia hri vanga mi 817 thi hi ni 78 hnua ni khata thi an tlem ber ni a ni. Ni thum chhung chu hri thihpui hi 1,000 hnuai lamah a tla thla tawh a ni.

Sorkar laipui chuan kum tawp hmain ram mipui puitling chin hnenah vaccine pek hman vek a tum. Thawhlehni khan mi nuai 36.5 hnenah vaccine semchhuah leh niin, Thawhṭannia vaccine nuai 52.76 semchhuah aiin a tlem zawk thung.

Prime minister Narendra Modi chuan ramchhunga vaccine semchhuah an kalpui dan chu a lungawi thlak hle tih sawiin, 'Mitin hnenah vaccine a thlawna sem' tih chu sorkar laipui intiamna a la nih reng thu a sawi.

Hri kai an tlakhniam zel avangin ramchhung hmun hrang hrangah khuahkhirhna te thlahdul chhoh zel a ni a, mahse mithiamte chuan lockdown thlahdul vanga hri kai pun belh leh hri leng thawh thumna a thlen mai an hlauthawng hle thung.

Madhya Pradesh, Maharashtra, Punjab, Gujarat, Kerala, Andhra Pradesh, Tamil Nadu, Odisha, Rajasthan, Jammu leh Karnataka-ahte coronavirus hri inkaichhawn awlsam tak Delta Plus variant kai an hmuh belh zel avangin hlauhthawnna a lian chho leh hle a ni.

Bharat Biotech vaccine siam Covaxin hian coronavirus inkai awlsam tak Alpha leh Delta variant lakah min venghim ṭha tih US National Institute of Health chuan nimin khan an sawi.