University/college zirlaite ni 10 chhungin vaccine pe vek dawn : Karnataka Dy CM

Karnataka sorkar chuan Covid-19 hri leng thawh hnihna tih ziaawm nan higher educational institute-a zirlaite chu ni 10 chhungin vaccine pek hman vek an tum tih Karnataka Deputy Chief Minister C N Ashwath Narayan chuan Thawhlehni khan a sawi.

Deputy CM chuan zirlaite hnena vaccine pek runpui kalpui tur hian Chief Minister's skill development scheme hnuaia zirlai inziaklut -Polytechnic, ITI, degree, engineering, medical, paramedical, diploma, university campus hnuaia zirlaite a huam vek dawn tih a sawi bawk.

Higher education minister ni bawk, Narayan hian Thawhṭanni khan Health and Medical Education Department official-te kawmin, college leh university zirlaite hnena vaccine pek vek hi an rel a ni.

State chhunga college leh university zirlaite vaccine pek tum hi sorkar chuan Covid-19 hri leng thawh thumna thleng thei laka an invenna kawng khat atana a ruahmanna siam a nih thu a sawi a, state chhunga oxygen generation capacity pawh tihpun an tum bawk.

College leh university zirlai te'n vaccine an lak theih chuan Karnataka huamchhunga higher education institution-te chu hawn thuai an nih beisei a ni a, mahse state sorkar erawh chuan hemi chungchangah hian thuchhuak engmah a la siam lo.