EU ram 8 leh Switzerland te'n Covishield pawm

European Union member ram pariat leh Switzerland chuan India ram chhunga Covid-19 vaccine siam, Covishield chu Green Pass list-a telh turin an pawm.

Sorkar laipuiin Covishied leh Covaxin chu EU Digital COVID Certificate / Green Pass-a pawm zingah telh tura a ngen hnuah, EU ram ṭhenkhatte chuan Covishield zawk chu an telh ta a ni.

Covishield vaccine pawm­puitu EU member ram pariatte chu - Austria, Germany, Slovenia, Greece, Iceland, Ireland, Estonia leh Spain-te an ni.

European Medicines Agency (EMA) chuan vaccine pali - Pfizer/BioNTech, Moderna, AstraZeneca-Oxford Vaxzervria leh Johnson & Johnson’s Janssen siam vaccine chauh pawmpuina a la pe a ni. Vaccine a pawm chin chauh hi hri len chhung chu EU huam chhungah an zin veivah phalsak an ni ang. Covishield hi World Health Organisation (WHO) in pawm tawh mah se, EMA hian Green Pass-ah a telh ve lo a ni. Hetih lai hian EU ramte hian a hranin WHO in a pawm tawh tawh vaccine pawmpuina hi an siam thei thung.

India rama vaccine siamte pawm a nih ve loh avangin sorkar laipui pawh a lungawi lo hle. Nilaini khan EU-in Covishield leh Covaxin a pawmpui lo a nih chuan, EU ram mipuite India rama zinte pawh quarantine rules siam sak an ni ve dawn tih a sawi a ni. CoWIN portal kaltlanga vaccination certificate pek chhuahte chu lo pawmsak turin a ngen a ni.